本帖最後由 HZ8186 於 2019-4-9 23:06 編輯
繼 浸鹹水遇溺記 第十一回, 小弟十二月中乘搭法航由英國返港渡假後, 今次小弟乘法航由香港返英國繼續小弟既學業 - 唯今次小弟係坐經濟艙既。 同上回既 AF188 一樣, 今次 AF185 係由一部 4-Class 既 B777-300ER 營運, 唯小弟到達巴黎後係會乘搭一部 ERJ145 前往英格蘭西部城市 Bristol, 而此航班係由 flybmi 聯營。
*小弟係於一九年一月中乘坐此航班 - 雖然 flyBMI 已於一九年二月十六號踏入歷史, 不過小弟都希望帶大家小弟對 ERJ145 既座後感。 小弟亦係文章末端寫左一段對歐洲 Regional Airlines 既感想, 希望大家細嚐~
--- Flight Info --- 13/1 AF185 HKG -> CDG B777-300ER F-GZNC HKG 2330 (2340) CDG 0550 (0515) (+1) 14/1 AF5542 (BM1882) CDG -> BRS ERJ-145 G-CKAF CDG 0955 (0955) BRS 1015 (0955)
--- Hong Kong International Airport ---
係香港預辦登機手續係一件非常暢快既事 - 小弟當晚乘 A21 到達機場後, 便把行李寄艙及通過安全檢查, 基本上到達機場後, 三十分鐘內小弟已經係禁區候機。
--- AF185 HKG->CDG ---
當晚登機同起飛都算非常暢順 - 航班於 23:40 起飛, 不久後航班已於深圳上空向歐洲進發。 飛機進入巡航高度後, 機組人員便派發濕紙巾及餐牌。 小弟係非常欣賞法航依然堅持派實體餐牌呢個決定 - 乘客可以確保餐飲入面唔會有致敏源之外, 機組人員既工作量亦可以大大減低。 同時, 法航派發既濕紙巾係同小弟上回 <遇溺記> 搭乘法航商務艙由倫敦前往巴黎機上派發既紙巾一樣。
起飛後不久, 機組人員便開始派發晚餐 - 今日頭盤有俄羅斯式沙律, 而主菜則有豬肉配薯菜及雞肉炒麵兩個選擇。 晚餐配有餐包及芝士之外, 甜品方面則有一份石榴蛋糕, 而主菜方面小弟點左份雞肉炒麵。法航既膳食質素只算一般 - 雞肉炒麵既麵質有少少奇怪 (半伊麵半扁意粉既麵?), 唯配上中式蜆汁後, 味道則算可接受。 石榴蛋糕係比較乾身, 同時今餐份量方面係偏細既。 順帶一提, 法航係極少數會於經濟艙提供香檳既航空公司之一 - 雖然佢用既香檳唔係名牌貨色, 不過如果閣下想廉價享受係三萬呎高空開香檳飲呢個享受既, 咁呢個都算試下無妨既~~
講翻今日既座位先 - 小弟今日坐係 28A, 係第一排經濟艙座位。 呢個位係唔需要加錢選購, 唯 YCL & PEY 之間係有一道牆, 變相呢排座位既 legroom 係稍為有限。 法航座位既 recline 都算 ok 既, 就算小弟身高大約 180cm, 當晚都瞓左六個鐘左右。 另外, 由於呢個位前方係無電視, 小弟既電視係放係座位既右下方, 同時托盤亦收納於手柄內。 由於 Air France 既商務艙同經濟艙係採用同一個 Inflight Entertainment System, 小弟係呢度就唔花篇幅介紹法航既 IFE 啦 - 唯一特別既係系統上既互動式地圖原來係用 Open Street Maps 既 API 既 - 呢個地圖係可以無限放大縮小既 - 而唔少地方甚至係會顯示埋地鐵站同路名添~
早餐係降落於前兩小時派發 - 今日早餐有一個蘋果酥, 乳酪, 生果 及一份配 Custard 既法式多士。 味道方面呢份早餐則算一般 - 個蘋果酥簡直係不知所謂, 不過個法式多士係既香口既。 同晚餐一樣, 早餐份量都係偏細, 不過整體上法航機上既膳食都算 ok 既。
餘下既旅程則好 uneventful - 收回早餐既托盤後, 機組人員便開始準備降落巴黎。 機組人員亦於降落前派一粒硬糖, 而航班於巴黎時間早上五點十五分降落, 為小弟既法航經濟艙初體驗畫上一個句號。
AF185 既晚餐 - 味道方面係ok既, 唯佢個雞肉炒麵麵質係好獨特
法航為經濟艙乘客提供既 Inflight Entertainment System - 法航當晚提供一個幾多元化既電影&電視劇選擇, 而小弟當晚則選擇重溫 BBC 既 Sherlock S3
螢幕呎寸係同位於椅背既螢幕一樣, 唯閣下係要用唔少盲力先可以調教螢幕角度
AF185 既早餐 - 雖然個份量係偏細, 不過被咖啡係非常之香濃~~
法航既經濟艙座位 - 可見 Row 28 前方既 Bulkhead 及 3-4-3 既 Cabin Configuration
--- Paris Charles de Gaulle ---
係巴黎戴高樂機場轉機都算係一個輕鬆既體驗黎。 由於 Air France 同 flyBMI 並沒有簽定 Interline Agreement, 小弟當日係要到達巴黎之後入境, 攞行李, 並步行至 T3 再次辦理等既手續。
(呢點小弟其實係感到詫異既 - 小弟既兩程機票都係經法航出, 而嚴格上小弟第二程機既航班篇號係 AF5542 而唔係 BM1882, 竟然咁都無 interline arrangement?)
既然當日小弟係有四個鐘既轉機時間, 入境法國後, 小弟就走左去逛 T1,2&3 既離境大堂。 巴黎戴高樂機場既 T1,2&3 係三個唔相連既客運大樓黎, 唯三者之間係有一條免費既無人列車 "CDGVAL" 連接。
T1 既離境大堂則以餐廳為主 - 雖然有大半餐廳都係午市先開門, 不過食早餐係有唔少選擇既。 T2 既離境大堂都係以辦理登機手續既櫃檯為主, 而整個客運大樓都唔係好見有商舖或餐廳。 T2 作為 CDG 最新開既客運大樓, 佢既室內設計當然係好 Mordern 好 "chic", 唯實際上小弟係覺得個大樓係偏暗 - 日頭既話其實個效果係做得幾好, 唯未天光既時候個客運大樓其實係幾陰沉既。 最後, T3 既 Landside 係非常簡陋 - 除左有間 Coffee Shop 同一間 Relay 之外其實真係咩都無。 當然, 使用 T3 既航空公司都係中少型既航空公司居多, 同時 IAG 既 LCC Level 以及 Vueling 都係同 CDG 既 T3 既。
flyBMI 既 Check-In Counter 於航班起飛前九十分鐘開啟。 辦理登機手續後, 小弟通過安全檢查及辦理離境手續便進入 T3 既 Airside。 (T3 係有做 Schengen & Non-Schengen 既航班 - 而 T3 既 Airside 亦用一塊玻璃分隔兩邊候機室) 雖然 T3 既 Airside 相對上比較係細, 不過佢既空間感同配套係做得非常好。 就算 Non-Schengen 既 Terminal 3 只係有七個閘口, 不過佢都有間 Relay, Pret, 同一間 Duty-Free。 同時, 落地玻璃配上合適既燈光, 令到全個候機範圍感覺上好空曠同好舒服。
係 CDG T2 既入境層望落候機區 - 當時係凌晨五點半, 呢個候機區/商場係空無一人既
CDG T2 既 Landside - 小弟係非常鐘意呢個呢個木紋天花板設計, 唯小弟覺得 T2 Landside 真係唔夠食肆同商舖。
CDG T3 既 Departures Board - 使用 T3 既航空公司主要都係比較細型既公司為主, 而 T3 當日只處理大約二十五班航班左右
CDG Terminal 3 既 Airside - 由於所有閘口都係 Bus-Gate, 因此呢個客運大樓其實只有地下一層。 雖然候機空間唔多, 不過個環境係幾舒服既。
--- BM1882 (AF5542) CDG->BRS ---
係候機室逛左一個鐘後, 小弟便乘接駁巴士到停機坪登機。 當日航機上只有四十幾人, 而登機程序則相當快捷。
由於機艙空間有限, 當日航班係設有一個 Valet Bag Service - 登機前乘客係會把比較大件既手提行李交俾地勤代為寄艙, 而降落後地勤亦會第一時間把手提行李還俾乘客 (機上 A 位上方係無 Overhead Bin Lockers, 而 BC 位上既儲存空間亦相當有限)。 用左十幾分鐘滑行到跑道之後, 航機於十時正準時起飛, 並向 Bristol 進發。
講翻今日既用機先 - 今日執飛 BM1882 既係 G-CKAF, 係一部有二十年機齡既 Embraer ERJ145。 呢部巴西製既客機係原先由 Air France 旗下既品牌 Regional/Hop! 營運, 而於2017年轉售予 bmi Regional。 呢部 ERJ145 係可以載五十位乘客, 而機艙係用一個 1+2 既座椅排位。 flyBMI 既原名係 bmi Regional, 係當年 British Midland International 既旗下品牌之一。 漢沙集團於 2012年把 bmi 連同 bmi Regional 售予英航之後, bmi 既航線被英航納入自己版圖之內, 而 bmi Regional 同年被拆售。 bmi Regional 2015年被 AIL (Loganair 既母公司) 買下, 而 2018年則改名為 flyBMI。
到達巡航高度後, 機組人員便開始派發小食同飲品。 雖然當日航程只係有一小時左右, 不過機上係依然會提供輕食既。 當日係有一塊曲奇同一杯果汁 - 雖然份量絕對食唔飽, 不過都可以滿足閣下既口隱既~~
雖然飛機已經有廿年機齡, 不過機上既配置都算係保養得宜 - 機上既皮櫈係非常之舒服, 而機艙內既設置目測都係有定期清潔既。 硬件上唯一缺點係張 fold-down tray table - 小弟座椅前方既檯係非常唔穩陣既。 另外, 機上既座椅應該係"二十年不變" - 座椅既手柄係依然設有煙灰缸既~~
不久後, 飛機已經飛越英倫海峽, 開始降低飛行高度, 並準備降落 Bristol。 繞過 Bath 既上空之後, 飛機便係 09:55 係 Bristol 降落。
呢部 Primera Air 既 A321 係 Terminal 3 對出停泊, 當時小弟都無唸過 flyBMI 會係一個月後步上 Primera 既後塵
ERJ 145 係設有內置樓梯既, 登機既時候係唔需要另外用 airstairs 既
ERJ 145 既機艙係用一個 1+2 既座位排位, 而 A 位上方係沒有 Overhead Bin Lockers。 同時, ERJ145 既機艙隔音係做得幾好 - 就算當日小弟坐係 18A (i.e. 機艙最後一排), 引擎聲係可接受既
flyBMI 既座位同座距都係非常之舒服 - 個皮櫈既 padding 做得好足, 而就算小弟坐係機艙最後一行, 張櫈依然係可以 recline 既。
每一個座位都設有一個煙灰缸 - 相信二十年黎應該無人用過呢個煙灰缸, 不過同樣二十年黎都無人清潔過呢個煙灰缸咯~~
其實呢部飛機有唔少位都好 90s feel - 位於座位上方既 Control Panel 相信就係一個好例子~~
flyBMI 提供既 Reading Material - 安全卡以及其 Inflight Magazine - Elevate。 由於 flyBMI 既主要目標客源係 Business Traveller, 因此呢本雜誌入面唔少文章都係介紹相關景點同滑雪場等。
機上既 light snack - 雖然呢個 '早餐' 既份量真係細, 不過都滿足到小弟既口隱既~~
我知道 天漸暗 只得你像當初的勇敢 不用怕 率真挺下去拒絕淪陷 哪怕伶仃海一片陌生
到達 Bristol - 地勤人員正卸下既係乘客既手提行李, 而乘客一踏出飛機就可以攞翻 Gate-Checked 既手提行李
BM1882 既起飛/降落片段 - 機上既 RR AE3007 spool up & shut down 既聲音真係好正 (Engine Shut Down @ 07:40) 順帶一提, flyBMI 既 ERJ145 係無裝 Thrust Reversers 既。 根據網上論壇, ERJ-145 上既 AE3007 既 Thrust Reversers 係可有可無既, 唯 Air France/Regional 當時則沒有購買呢個選項。
--- Bristol (BRS) ---
flyBMI 係 Bristol 都係用 Bus-Gate 既。 步行落機後, 先係 Valet Baggage Cart 攞翻手提行李, 後再乘搭接駁巴士辦理入境手續。係 Bristol 入境英國亦係一件極之輕鬆既事黎 - 搭啱英國入境處職員既問題之後 (i.e. 你係邊度讀書? 你讀咩科? 你點解要係 Bristol 入境?) 小弟就獲放行入境。
同 Norwich 同 London City 一樣, 機艙行李送抵既速度係同機場大小成正比既 - 小弟辦理完入境手續已經見到小弟既行李係輸送帶上面轉緊。 小弟攞左行李之後便乘搭當地既機場巴士前往市區, 為小弟既 法航 Multi-City Trip 畫上一個句號。
十六小時後, 小弟終於到達 Bristol, 為呢個法航 Multi-City Trip 畫上一個句號。 小弟亦會係五月乘坐 Eastern Airways 既 Jetstream 41 由威爾斯北部飛往威爾斯首府 Cardiff, Stay tuned!
--- Verdict ---
總括 AF185 BM1882 兩程機, AF185 係合乎小弟期望既, 而 BM1882 對小弟黎講係有驚喜。
無可否認, 擁有 3-4-3 Cabin Layout 既 777-300ER Econ 位一定係會比較逼同狹窄, 唯張櫈recline到盡既話 (同埋如果閣下有心理準備既話) 坐足十二個鐘既感覺都算尚可既。 AF185 上提供既膳食味道係幾好, 唯早晚兩餐既份量都係偏細。 當然, 係一個 red-eye 航班上, 飛機餐既份量未必係咁總要, 唯如果閣下係搭法航過大海既話, 咁我會建議閣下帶少少零食上機啦~~
小弟係非常欣賞 BM1882 上既服務 - 雖然 flyBMI 係一間細既航空公司, 不過佢既服務係依然做得好足。 首先, 雖然今日只係有一位機組人員當值, 不過佢既服務係非常專業同周到, 甚至係可以睇得出佢對份工既熱誠。 硬件方面, flyBMI 既保養係做得幾好 - 雖然部飛機仲老過小弟, 不過除左張檯鬆鬆地之外, 座位同座距都係非常舒服, 而成個機艙係非常整潔既。 順帶一提, flyBMI 係會按航班時間而提供餐飲既, 小弟之後上網翻查資料見到佢其他航班係有三文治同酒水提供添~~
價錢方面, 呢個半 J 半 Y 既 LHR-CDG-HKG, HKG-CDG-BRS 既 Air France Multi-City Trip 總共係用左萬二蚊左右
LHR-CDG-HKG JCL £810 HKG-CDG-BRS YCL £320 *購票當時 GBP:HKD 為 1:10.6, 折合港幣約 $12000 左右
雖然呢個價格係有下調空間, 不過論服務同硬件, 呢個定價係非常合理既。 當國泰既倫敦香港經濟艙學生飛都係賣緊$12000既時候, 同樣價錢買一程 JCL 一程 YCL 其實係幾抵玩既。 (當然, 國泰既學生飛係可以俾你免費無限次改期同儲里數既, 唯當日小弟既 Ticket Class 係無得改期+只係有 50% 里數 - 咁要唔要加錢買 flexibility 呢個就由閣下決定啦) 法航既價格係幾抵玩既 - 佢係有 U26 既 Youth Fare 提供, 而 LHR-HKG 既 YCL/PEY Youth Saver 價格係由 £228/£308 起跳。 如果價格合適既話, 小弟日後都會考慮乘搭法航來往香港及英國既。
--- 後記 Afterthought ---
小弟於一月中搭完呢兩程機之後, 唔過一個月小弟就收到 FlyBMI 結業既消息。 實不相瞞, 小弟並沒有對呢個消息感到震驚, 畢竟近期已經有不少歐洲中少型航空公司接二連三咁倒閉 (SkyWorks, Germania, Primera, Colbalt, Darwin, Monarch, VLM...) 或許小弟已經對此事感到麻木吧...
flyBMI 發出既新聞稿將公司倒閉事宜矛頭直指英國脫歐, 唯小弟則不敢完全認同 - 的確 Bresh*t 為歐洲既航空業帶黎極大既不穩定因素 - 唯小弟相信 flyBMI 結業既主因係佢既市場定位早已過時, 以及其母公司可能*早已為 flyBMI 另有安排吧。
之前都聽過唔少熟悉歐洲航空市場既人表示, 由於近年歐洲唔少航空公司有過度擴張既情況出現, 唔少歐洲航線普遍都係有供過於求既情況出現。 flyBMI 係唔少歐洲路線同 easyjet 重覆, 再加本身 flyBMI 既主要目標客源係 Regional Business Traveller 呢個 niche, 變相 flyBMI 既處境近年係比較艱難既。
flyBMI 既母公司 AIL 對 flyBMI 結業既取態亦係耐人尋味既 - flyBMI 結業後不久, 同樣都係 AIL 旗下既 Loganair 已經宣佈會接管 flyBMI 部份既英國及愛爾蘭航線, 而 flyBMI 旗下既部份 ERJ135 既 ERJ145 亦以光速轉投 Loganair 既機隊。 (批 ERJ135 係會用黎替換年事已高既 Do328 添) 雖然機師同機組人員既安排小弟唔清楚, 不過一個咁合時宜既倒閉配上一個咁順暢既交接... Hmmm... 小弟都係唔好作咁多胡亂既猜測啦 ????
不過論歐洲既 Regional Aviation 既將來, 小弟認為將來真正獨立既 Regional Airline 係會越做越少, 而大部份中小型航空公司一係會被大公司買下, (例如而家屬於漢沙集團既 Air Dolomiti 等) 一係同大公司玩 Codeshare 及 Interline。 (例如近期開始做 AF, KLM 航班聯營既 Widerøe) 除非本身個航空公司有獨有既地理優勢, 例如連接英國及英屬離岸島嶼 Guernsey 既 Aurigny, 及專做瑞典內陸航班既 BRA Braathens, 否則該公司一般都難以生存。
呢個趨勢亦可以係歐洲既廉航業入面見到 - 係傳統航空公司開始轉營以及係 Ryanair 維持其市場策略既情況下 (i.e. 見你條線做得唔差就過黎踩場) 基本上小型同初創既 LCC 同 ULCC 係被困於兩難之間 - 為維持客量增長而發展新航線, 或係現有既航線上面割價促銷 - 因此中小型既 LCC 係剩餘極少既生存空間。
當然, 事到如今, 小弟除左可以惋惜呢個航空公司既沒落之外, 則只可以冷眼看 2019年呢個歐洲航空界既嚴冬啦。
--- 如果閣下鐘意小弟既飛行報告既話, 不妨睇埋小弟之前寫落既飛行報告~~
浸鹹水遇溺記 第七回 BE7671 NCL-BHD-IOM 尋找 Jetstream 41 的故事 - 不日推出 第八回 BA3287 IOM-LCY 尋找 Saab 2000 的故事 - 不日推出
|
樓主
