本帖最後由 MA4745@85A 於 2024-6-25 22:40 編輯
經過幾日喺洛杉磯嘅旅程，終於要返香港繼續完成學業，但係竟然喺返香港啲程機遇上突如其來嘅驚喜！
日期：27/04/2024 航班：CX883 [Los Angeles International Airport (LAX) > Hong Kong International Airport (HKG)] 表定時間：23:30 (GMT-7) - 05:45 (+2) (GMT+8) 實際時間：23:35 (GMT-7) - 05:52 (+2) (GMT+8) 機型：777-367ER (BKPE)
由於本身機票性質有啲特別，所以小弟 Online check-in 嘅時候係俾人掉咗落去 wait list，為咗確保可以順利返到香港（第二日要返學），於是比原定時間早咗一啲去機場，諗住睇吓咩環境，恰巧嗰日一個鐘頭之內國泰有兩班機返香港（CX881 & CX883），所以應該返到嚟嘅機會大啲。
點知原來早啲嚟機場係冇用㗎，個櫃檯根本都冇人，等咗一段時間先見到班地勤人員施施然咁行過嚟，做埋 briefing 遲咗10分鐘先開櫃位。其實LAX嗰度嘅職員都「十分鼓勵」Y 同 PEY 嘅乘客使用自助 check-in 機，不過可惜小弟唔 sure 張機票，所以就一定要排櫃位去 check-in。
小弟懷着忐忑不安嘅心情，喺好驚返唔到香港嘅情況底下去 check-in，喺地勤人員同佢上頭透過電話多輪交接之後，終於出到張機票，寄埋行李仲要件行李啱啱好23kg。然後望一望張機票，竟然坐 Row 33，再望清楚啲竟然俾人 upgrade 咗去 PEY！（詳情唔方便透露，不過都屬於幾幸運嘅情況）［唔知點解張相轉唔返直］
坐PEY冇得入lounge，亦都冇得快速通關，唯一只會快過你後邊嗰201個坐Y嘅人早啲上機，不過機上服務就真係有啲唔同嘅。
上咗機坐定之後，首先會派 welcome drink 同埋熱毛巾，然後座位上面已經放好晒毛氈、枕頭、降噪耳機同埋一個過夜包。毛氈係比一般坐Y嗰張厚少少同埋舒服少少，過夜包入邊有一對襪丶一個眼罩丶一支牙刷連埋牙膏同埋耳塞，用PEY嘅水準嚟講覺得算唔錯，可能係小弟第一次坐！
PEY服務同設施點都一定比Y好，唯一輸比Y就嘅係佢個 IFE System，話說國泰嘅77W今年先開始翻新PEY同埋J，但係2018年已經將Y由3-3-3變3-4-3排列嘅時候順便換咗個 IFE System，所以Y個 touch mon 係比PEY嗰個好，而PEY係仲有保留座位旁邊嘅遙控器方便控制，所以呢方面稍為遜色一啲。
起飛大概一個鐘頭之後就排晚餐，小弟選擇咗呢個港式咖喱西蘭花絲苗白飯，當然坐得PEY餐具都會高級啲，用嘅係瓷器容器，同埋前菜都會豐富啲，甜品就都係一樣食H牌雪糕。唔知係咪份量比平時坐Y多，係小弟難得第一次爭啲食唔晒成個飛機餐。PEY喺酒水方面會有更加多嘅酒款選擇，可惜小弟冇太大興趣，只係飲咗罐Betsy啤酒。
可能係張凳舒服啲，食完飯之後小弟竟然可以瞓咗八個鐘冇醒過。起身睇咗一陣電視，喺降落前三個鐘就派早餐。小弟揀咗班尼迪蛋、炒菠菜、薯餅、煙肉早餐，味道不錯另外仲有鮮果乳酪同餐包，又係一餐好飽嘅飛機餐。
食完早餐過多陣就差唔多日出，然後就準備降落香港機場，可惜當日天氣唔好，下降期間一直穿過唔同雲層，睇唔到日出⋯⋯
經過15個鐘頭多少少嘅航程，終於返到嚟香港，完成呢個美國之行！
—(完)—
| 
樓主