如何在香港西九龍站領回高鐵車箱失物

最近搭高鐵(內地列車)返港時在車廂內遺留物品, 在中鐵, 港鐵, 內地邊檢及入境處協助下成功領回, 以下分享認領過程:

背景:
我是在深圳北站乘坐南下列車直達香港西九龍站, 把充電器插在座位下插座充電, 下車時忘記取回, 直到出閘後才發現

失物如何處理:
如果是南下, 列車在香港西九龍站會做一次清車, 如果發現失物會先交給港鐵車站職員, 他們會把失物存放在候車層的服務櫃檯7日, 如果無人認領, 會送回福田站失物認領處存放30日再處理.
但若果是北上, 就必須向中鐵經12306(電話/App)查詢(因為會在中途站/終到站清車), 如果有發現該車次列車長會打電話/send SMS通知你去邊個站領取.
你可以打港鐵的高鐵失物認領處電話查詢是否找到失物(要報車次, 乘車日期, 大概位置(車號, 座位)以及形容失物(類別, 牌子, 顏色), 如果有的話, 你可以按以下方法認領 (由於失物在法理上是在內地, 失物認領處不能直接代你領取, 而需要你親自進內地口岸區領取):

事先聲明:
以下為親身經歷, 但港鐵職員有明確表示內地邊檢人員有權拒絕你在領取失物後回流香港口岸區, 若果發生則需即時購買車票前往內地車站再回港.

去香港西九龍站需要準備以下東西:

• 香港同內地出入境證件
• 裝好12306 App的電話 (證明你有搭該車次, 以及萬一要買車票)
• 足夠飲用水
• 唔好帶煙/酒(下面會解釋點解)
  

認領過程:

• 先去B2出閘區附近的失物認領處（講番車次, 乘車日期, 大概位置(車號, 座位)，物件形容（類別，顏色，牌子）)
• 如果搵得到，你可以要求安排港鐵職員escort 你入去內地口岸區攞，職員會話你知幾點番來，中間你可以去買定飲品（入咗閘冇野買的）
• 整點會有港鐵職員出現，佢會比張證明你入去內地口岸區領取失物，然候會帶你去離境層, 你需要通過高鐵安檢（經職員通道），然後正常地辦理香港出境/內地入境手續（可以用e 道），港鐵職員會行另一條通道過境。
• 過左內地海關檢查後，港鐵職員會帶你去候車區counter 攞番失物（登記證件+電話，簽名就可以攞番失物）
• 港鐵職員會帶你番去內地入境counter, 會交你比內地邊檢公安（你要比回鄉證個公安，佢地有決定權比唔比你回流香港，如果唔得就買車飛去福田再番香港）
• 如果內地邊檢比你回流香港，會「扣留」你一陣處理內地出境手續+通知入境處派人接你，然後會帶你番去內地/香港口岸區條邊界，會有入境處職員響邊界另一邊等你（內地邊檢公安比會比張回鄉證入境處職員keep)
• 比張身份證個入境處職員，佢會叫你過番香港口岸區，然後帶你去入境處office。
• 入境處會響office處理埋香港入境手續，完成後會叫港鐵職員escort 你（兩張證件會響呢個位比番你，入境處會有張pass比個港鐵職員話帶人通過）
• 你要再通過香港海關出境檢查，關員會問你有身上冇煙酒(我答無, 但如果你有應該會有麻煩, 因為你係回流返香港, 係無免稅額度的)。
• 港鐵職員會帶你行職員通道去番香港入境層（中間有入境處checkpoint 收走張pass)，
• 你要再通過香港海關入境檢查（隨身物品會掃X 光，被escort 既人係一定會check的）
• 然後港鐵職員會帶你出閘，到此完成。
  

成個流程需時大概45-60分鐘
感謝當中所有人(港鐵職員, 該車次列車長, 內地邊檢公安, 香港入境處, 香港海關)的協助.

如果當初立法會議員否決西九龍一地兩檢，相信唔會搞到手續咁麻煩，一地兩檢究竟係邊個天才提出呢？

京华客车 發表於 2024-11-4 00:39
如果當初立法會議員否決西九龍一地兩檢，相信唔會搞到手續咁麻煩，一地兩檢究竟係邊個天才提出呢？ ...

如果當初立法會議員否決西九龍一地兩檢，相信唔會搞到咁多直達(車)站點，一地兩檢究竟係邊個天才提出呢？

京华客车 發表於 2024-11-4 00:39
如果當初立法會議員否決西九龍一地兩檢，相信唔會搞到手續咁麻煩，一地兩檢究竟係邊個天才提出呢？ ...

如果當初立法會議員否決西九龍一地兩檢，相信唔會搞到手續咁麻煩

   
   
         你如果了解過內地有國際功能嘅機場數量、以及申請條件，你就知道「一地兩檢」嘅好處，唔係所有城市都有機會申請到機場、鐵路口岸。最重要係，09年左右，當時鐵路部有啲領導本身就反對直通車「兩地兩檢」模式，尤其反對高鐵照樣用呢個模式，有兩個理由。

          首先，兩檢模式下，部動車壞咗故障，停係路度，需要清客，啲乘客因為清關問題，要當地鐵路海關口岸啲人過來解決，係普速鐵路幹綫仲好，高鐵幹綫？有啲綫路區間、車站起喺山卡拉、冇雷公噉遠，邊度抄海關佢哋過來？？？如果係冇口岸嘅地方，請問點解決？？？

          其次，兩檢模式下，班次受限，只能開既有6個鐵路口岸嘅進港高鐵列車「北京、上海、廣州、佛山、肇慶」，其他城市點搞？？？要記住，只要特定鐵路口岸先有到港過關功能，其他類型根本唔得㗎！若只能開呢幾個站，倒不如深圳北起聯絡綫到深圳火車站，然後東鐵大改造，界限調到中國鐵路最大限界3400mm，畀市域C型車、動車組入紅磡算數！

一地兩檢究竟係邊個天才提出呢？

   深圳灣口岸就係一地兩檢就国家首個試驗點。鐵路口岸一地兩檢最早源於歐洲之星；St. Pancras檢英國出境同申根入境，巴黎北站、布魯塞爾南站檢申根出境同英國入境。其實嗰時搞深圳灣呢個「頭啖湯」就係為咗日後高鐵西九口岸㗎。本身01年兩地政府就已經商討過要學習歐洲整呢個喇，具體內容你Google一下，網上大把相關資料。

       其實最犀利嘅應該係「合作查驗，一次放行」，俗稱「兩地一檢」，呢個真係中國自家發明嘅，澳門通向珠海火車站嘅青茂口岸、通向城際橫琴站嘅橫琴口岸就係呢個模式，方便內地搭客落澳門；澳門搭客搭高鐵城際，問題係青茂唔支持Passport，如需Passport過澳門，只能乖乖地去青茂、拱北關閘等關口過咯。

中國邊檢基於咩原因會唔俾人直接返香港?

魔雪巴士頻道 發表於 2024-11-4 15:21
中國邊檢基於咩原因會唔俾人直接返香港?

簡單來講，當你完成兩地出入境及海關檢查，進入了候車區後，正常來講是應該要登車前往內地車站的。
若果容許你直接倒流返回香港口岸區，那是中國邊檢的酌情處理而已。

skpracta 發表於 2024-11-4 17:04
簡單來講，當你完成兩地出入境及海關檢查，進入了候車區後，正常來講是應該要登車前往內地車站的。
若果 ...

其實應該類似香港的邊境禁區,正常情况下完成出入境後要必須朝正確人流方向離開口岸禁區範圍而不可以行反方向即時重新出入境
文中也有提是在入境櫃枱交接

只係其他內地口岸的禁區範圍相對比香港細得多
(例如深圳灣只係旅遊巴士上下車區係禁區範圍. 福口口岸就只限2-3樓, 不包括4號線地鐵站大堂層...禁區範圍內地出境入口最近也加貼了告示無授權進入口岸禁區/在口岸禁區逗留可作擾亂口岸秩序依法處罰)
香港深圳灣同落馬州支線口岸就一定要乘公共交通離開才能重新出入境

應該係有關部門將整個西九龍內地口岸區視作內地法律的口岸禁區範圍,所以要登車前往內地車站才離開口岸禁區範圍

如果個程序係咁的話，我寧願等多7日去福田站取件。

最大問題係要deport，留下這個記錄，對你日後回內地，有機會會發生麻煩，
去外國的話，其實係要申報的，還有機會被拒絕入境。這些記錄抺不走的。

最後也謝謝您提供方案，日後可作參考。

cx838 發表於 2024-11-6 09:24
如果個程序係咁的話，我寧願等多7日去福田站取件。

最大問題係要deport，留下這個記錄，對你日後回內地， ...

其實呢, 我就無比內地邊檢deport(遞解出境)的, 因為:

• 我係成功通過晒內地入境檢查+海關檢查, 踏入左內地地區先至拿到失物
• 如果係deport, 我會有份文書寫明我被內地拒絕入境同埋註銷內地入境證件. 但我無, 亦都成功取回回鄉證)
• 果個"扣留" 只係幫我做出境手續, 因為要晌內地入境層處理
  

不過我都會留意接下來入境內地時會留意下有無不必要的麻煩
(我被內地邊檢同海關截停請入房都有經驗, 但每次都能夠全身而退)

Danny.lin 發表於 2024-11-4 06:36
你如果了解過內地有國際功能嘅機場數量、以及申請條件，你就知道「一地兩檢」嘅好 ...

咁大聲叫人Google應該唔難搵到分別响邊，其他地區都係响出發地預先做定目的地嘅入境手續，出發地嘅管轄權不變。

香港西九龍站係無論北上定南下，都係黎到香港先至做手續喎。

你自己都識得話係內地自己整出入境管制限制多多啦。

為住上面限制多多搭車便利都唔係問題，內地要响西九龍站擺邊防，係咪一定要整埋內地管轄區呢？
呢個係無論當日嘅爭議以至今日日常運作定係好似樓主嘅失物認領都煩好多嘅根源。


兩地一檢講到好巴閉更加係得啖笑，歐洲之星同站做哂、美國border pre-clearance根本就係特登要隔開。
根據一國兩制澳門同中國嘅出入境管制係分開嘅。
擺埋一齊咪俾另一邊睇哂？咁仲係咪兩制呢？