[個人建議] 沙田區嘔車北上小修小補合集

自沙中線通車以嚟，沙田區一直都係cut車重災區，無他，單價低加上人口老化，本身生意都唔容易做。奈何 (對紅巴嚟講)好多時啲鴻圖大計都係死喺啲細節位上。

適逢紅巴喺新東中哂富蝶，古洞，粉北線，又要籌車比皇崗，點都要拉車北上，與其以不變應萬變搞到成區都30-35分鐘一班，不如睇下有冇咩 quick win小修小補，大多數乘客冇乜影響，又比到紅巴唧車出嚟。

相信有唔少計劃已經有其他版友提出過，容許我用呢個機會重新審視呢啲計劃，就算慳唔到車都可能會慳到油。

1. 方格84M縮短至濱景花園

之前同版友討論過，84M富安唔係冇人上車，但係自從89S開線，其實區內客可以搭佢，區外客行出去都有85M (樂富就算啦)。因應繁時富安仍然有翻咁上下需求，所以只建議非繁同假日行走嘅方格84M縮去濱景，相信應該可以慳到一架車。

2. 285 改為繁時線

呢條線本身班次都唔太吸引，尤其火炭方向呢幾年多左唔少平行路線，相信如果其他線平啲，285嘅價值只會更低。建議285只喺星期一至六 0630-1000，1600-2100 服務，其餘時間由85新增駿洋至大會堂嘅$5.20 雙向分段。85同時會稍為加密班次，全日大部份時間改為15-20分鐘一班，並推遲火炭開尾車至2340，九龍城開頭車提早至 0555，以稍為補償285清晨深夜時段逆向服務。同時考慮其他路線亦可以新增雙向分段，例如88X甚至48P。

3. 289K改為富安直出

呢個行法早幾年都有版友提早過，基本上就係原線行到富安之後，經恆信街，西沙路天橋停第二次恆輝街站，再經迴旋處調頭翻大學站。用車本身唔多所以都唔會慳到幾多車，不過透過減少車站，減少上落客時間，從而睇下有冇得慳行車時間，就算加唔到班都起碼可以慳下油。對77區一眾屋苑嚟講，車程唔一定會長幾多，上游甚至多左機會有位坐，而唔駛過馬路上車都係一個吸引點。

4. 284縮時

昔日唔憂做嘅接駁線，去到今時今日已經驚現 25-30分鐘一班班次。早年紅巴士提早尾車嘅路線，通常都係啲冇客嘅巴士獨市位 (冇錯佢地都有小巴)，例如廣播道又一村。對面海呢？94A之流有齊替代咪再提早啲。擺翻過對面海，其實都有唔少地方可以試玩呢招，當慳下油都好。建議284星期六日/紅日頭車推遲至0800，尾車改為2220，並稍為全日減班。同時299X新增沙市至濱景 $4.60雙向分段收費，並稍為加密班次。好多版友以前都有提過用85K 86K食284，但係沙火同沙市始終有少少分別，另外因為車費問題，本身都冇太多濱景客會搭西貢方向嘅299X，所以相信新分段唔會太過影響營收。本身都有冧過叫299X兜入安景街，但係覺得全日入會拖慢車程，部份時間入又會亂，所以唔入好過，同翠湖花園講聲對唔住先。

5. 83K縮時

同樣道理，83K理論上都可以斬走尾段，星期六日同紅日尾車改為2230，並且日中落翻20甚至25分鐘一班。但代價係要開哂雙分比49X 86甚至 85A...唔打算幫呢堆線加車，如果牛皮沙嘈嘅咪改埋條49X入去比佢。相信可以唧到架車出嚟北上。

6. 亞公角街九東線

冇乜特別意義，純粹想少啲車入亞公角街令到條路順啲，集中翻客源，當然如果cut到車就更好，不過唔熟行情所以就唔特別傾班次。建議所有89P南行班次加停錦駿苑並飛走亞公角，因為錦駿苑一帶繼續有新樓所以唔打算明顯減班，但係淨低嘅89C 89C特同埋 89D都唔會再特別加車。89D北行飛彩虹特班正名為89P北行，咁相信對司機對乘客都會易明啲。另外因應本版五天工作週KOL呼籲，89P同埋 89C特班星期六可以考慮適量減班，谷翻乘客落本線，嘔車北上。

7. 81C星期六全日服務

即係朝早唔再拆 281B/X。兩者都開到半個鐘一班就無謂，當然合併翻好大機會要開20分鐘一班所以唔肯定有冇慳到車，最驚佢開25分鐘一班。

暫時冧到咁多先，今次特別唔掂本版熱門 87C/D 85A 86之類，廢事一陣要加車就麻煩，今次目的係小修小補嘅屎忽數...