九巴你要點樣先肯為39M按編定班次開車？

其實好簡單姐，而家10個煲得5個蓋，要夠車長開齊車咪加人工囉
巴士公司唔係開善堂，咁要加人工咪加車費囉，唔係加幾個%呀，係要加一至兩倍，你求其揾下外國一個人工中位數同香港差唔多的地方，睇下搭一程巴士要幾錢？

咩話，你話加一兩倍咁不如搭的士？Sorry，其實香港所有交通工具都太平囉，你覺得如果的士車費double，仲有無咁多的士佬問題？

加人工請到人，仲可以淘汰埋年齡過高的商用車司機，減低意外風險

toyl 發表於 2026-6-3 10:24
YC 發表於 2026-6-2 22:52
多謝提供資訊。

拍齊分段，仲有一堆轉乘無拍齊呢, 跟返足啲錢銀嘢呀雙向分段呀轉乘呀，咁就算取消39M瓜分落去其他嘢，例如243M 42M 拉上山又好，都無話唔得吖。

過海車934A開兩班都好似要求人咁，入信投訴回程頭車間唔中西隧留後之後，加個934轉乘又唔可以係愉景新城東行上39M(行天橋譚仔落返去係舒服好多)，美環街上山又上唔到39AM，個轉乘又唔包30(X)，講咩見車就上，根本就係想趕走你班轉車客。咁不如取消咗成條線拉埋930AX上山算，反正回程沙咀道直行上山兜個圈可能同轉右停消防局交通部相差不遠。試過幾次934轉39M係上唔到車之後，都係算數落荃灣線+小巴無咁嬲。

路德圍而家放工都識得擺部95M吉車，上荃中荃景要比錢就不如上小巴，起碼密密有車，上山落埋車可能都未有39M。以前密車嘅時候，小巴唔會放車落路德圍爭，密密有車都唔介意比九巴賺下，而家真係不了。

九龍東真係感謝NR342，以前陽光開埋啲時間根本唔係比人返工嘅，所以冇問題架，而家NR車朝早25分鐘落到九龍灣，多謝九巴多年不作為，讓條路出嚟比我哋有真正特快坐。

Mercer 發表於 2026-6-3 10:53
荃灣上梨木樹既48X 73X, 石圍角既43X, 應該好服務過39M.

搭30X 落山可能服務都好啲啲.

就算係荃威落山都好近, 係夏天或落大雨時會多人等車, 正常黎講大把人用腳投票
好耐以前未有愉景新城條通道同未有荃景圍天橋都仲好Ｄ

39M 對九巴黎講係負擔，唔知會唔會30X雙分處理左佢, 大部份人都係荃灣站落車, 果個站擺兩部機唔難
最多早繁留返幾班幾班經美環街直去西樓角路

MP7697 發表於 2026-6-3 10:59
其實好簡單姐，而家10個煲得5個蓋，要夠車長開齊車咪加人工囉
巴士公司唔係開善堂，咁要加人工咪加車費囉， ...

的士呢個價錢，如果真係太平嘅，市場上就唔會出現85折同定食。你個價錢拉高，再多啲人做網約車，經濟學嚟講就會達至市場最佳化，當然之後發牌係另一件事，但係咁多年來，由14座變紅頂，之後出現Call Van 載客，再去到Uber，呢個時代就係會因應需求供應去調整價格。而家經濟唔好，無工開就會有更多人揸部車出街做生意，幫補下家計。


但係巴士唔同，佢本身並唔係所有人都可以做嘅市場，你唔可以開架車走出去站站停，啲巴士站本身係禁區，雖然可能所謂嘅按需求巴士其實就係想進一步殺線，但係以香港啲IT，當年P960/8都搞唔掂，就不如寄望電動滑板車，電動單車同埋扶手電梯/升降機網絡可以普及，達致全民唔使(唔一定要)坐巴士。餐廳一次等得耐，下次可以幫襯其他餐廳；買衫唔啱自己心水，下次可以買第二間；但係公共交通，你只可以選擇坐，定係俾貴啲坐0066坐Uber坐的士。壟斷市場嘅電力公司，有事都要問責，難聽啲講同行0066，延誤都要撥錢落去俾優惠，新加坡開少咗班次係會扣錢，唯獨係呢度，無後果不特止，仲要Blame the victim，同大家講蝕錢丫嘛。

的確私人公司唔係做善堂，但係公共交通服務點解所有國家都需要規管，點解咁多地方都係政府營運，正正就係如果單純講盈利，其實全香港有一半路線個邊際效益都好低。如果單單講盈利，全部車做A線B線H線，其他就放棄，咁但係呢個並唔係一個已發展地區應有嘅交通服務水平。新加坡、台北、東京、倫敦都有不同程度嘅政府介入，去維持合理嘅巴士服務，國內城市更加係積極介入。

收費架構係有問題嘅，就真係正正經經調整，市場就會自己調節。價錢太高嘅，就會有其他服務營運而生，可能過多幾年，好似泰國咁有班電單車佬係鐵站出面做短途客都無話唔可以係一個替代。如果真係要當佢係私人市場嘅，就唔該開放成個市場出嚟做，社會責任嘅線，就政府自己營辦；要當佢係公營服務嘅，就檢討現時嘅服務水平同收費制度。

而家係減班減班減班，大家都知跌落一個咩循環；但係同時間唔比市場自己調節，唔比佢哋有替代品，禁區限制就多多，咁最後就係大家只係能夠默默承受同死忍。而家你話佢係開放市場咩，又唔係；你話佢係公益服務咩，又唔係，最後就係將營辦商同乘客推向對立面。

又收到15，結果企滿人

Toz 發表於 2026-6-3 16:50
就算係荃威落山都好近, 係夏天或落大雨時會多人等車, 正常黎講大把人用腳投票
好耐以前未有愉景新城條通道 ...

如果唔係荃威客對於一程車去富華街有咁大需求

39M 應該一早俾人瓜分咗

toyl 發表於 2026-6-3 10:24
YC 發表於 2026-6-2 22:52
多謝提供資訊。

下繁九巴要啲客見車就上善用資源唔好揀車搭，無問題，因為咁樣而唔想39M開密啲，都無問題，但係咪應該係編定班次度反映返真實班次呢？就正如我首篇文章的後半段所講。諗住下繁只開15分鐘一班就算，但編定班次就寫10分鐘一班，真係擺明呃人。同埋上繁都一樣經常收車，前日早繁就有收。

MP7697 發表於 2026-6-3 10:59
其實好簡單姐，而家10個煲得5個蓋，要夠車長開齊車咪加人工囉
巴士公司唔係開善堂，咁要加人工咪加車費囉， ...

真係唔夠車長開齊車，正如我首篇文章後半段所講應該修改編定班次，將而家10分鐘一班修訂為15分鐘一班，夠車長果陣可以開密過編定班次，而唔係好似而家咁樣經常開疏過編定班次。

你話香港交通費比起外國算平呢點我唔反對。

WN4156 發表於 2026-6-3 18:43
又收到15，結果企滿人

頭先1755起由本應10分鐘一班收到15分鐘一班，持續到2155，之後先無再收車，唔止企滿人，直頭頂閘留後。39M收車係經常發生的事，隔離西約34M就絕大部分時間開齊車。

YC 發表於 2026-6-3 23:04
下繁九巴要啲客見車就上善用資源唔好揀車搭，無問題，因為咁樣而唔想39M開密啲，都無問題，但係咪應該係編 ...

其實當編定班次減到15分嘅時候，實際上只會變成開20分一班