分享:細過時做過既百厭事情

唔知大家細過時做過咩百厭野呢?
我講先:
1.細過時搭Cityflyer行唔知5號定10號線,
係上層見到頭頂有好多制
跟住我狂按個落車鐘
搞到個司機上黎鬧人...
2.係茶樓飲茶時係點心紙寫第二張抬既抬號,
幫人劃點心....
3.係便利店睇雜誌超過十分鐘,
跟住個店員問我:「細路,你本野係邊到買架?
跟住我就好唔好意思咁放低本野走..

而家回想番,都認為自己細過做既好幼稚

原帖由 owen1234 於 2006-3-11 17:38 發表
3.係便利店睇雜誌超過十分鐘,
跟住個店員問我:「細路,你本野係邊到買架?
跟住我就好唔好意思咁放低本野走..

呢樣野一o的都唔幼稚
睇下幾多人o係便利店睇好耐雜誌
就連o的乜週雜誌都偷影到明星o係便利店睇雜誌啦!

同人飲茶時最興將牙籤放響杯茶度
將成副啤牌擲落響桶水度

以前我有d 百厭事
無論大人同小朋友都千祈唔好學：

1. 我響屋企扮科學家做實驗
將屋企所有既液體
包括消毒藥水、藥油、香水等溝埋一齊
(偶爾加d 藥丸、臭丸等)
有一次我阿媽返到屋企
我居然將我既「實驗品」倒哂落床角尾
結果我阿媽響床角尾執野...
好多d 液體冇腐蝕性

2. 好多時我都掉哂d 被、枕頭等床上用品落地
之後響上格床跳落黎

3. 我又試過扮髮型師
剪到自己d 頭髮唔知似乜
結果俾我阿婆捉左我去剃光個頭

4. 讀書果陣
我都試過推d 男同學入女廁

5. 以前經常摺左d 紙飛機
然後飛出街
睇住架飛機飛去對面馬路
根住響閃卡年代
就將d 重複既閃卡
好似飛標咁飛出街

[ 本帖最後由 Ketsu 於 2006-3-12 13:59 編輯 ]

我姨媽表弟住順利村(長型樓)，試過同表弟和細佬走去走廊尾小便落街(13樓)，
一條條水柱十幾層樓高好壯觀，下面是垃圾站。

聲明：個陣真係好細好細個，唔知醜。

唔知如果發生o係今時今日會俾房署扣幾多分呢？

[ 本帖最後由 fai 於 2006-3-11 23:17 編輯 ]

試過搭巴士,落車時狂按個落車鐘,搞到個司機鬧我。

現在回想起來,覺得自己很不對。

臨出lift時
按晒所有樓層的掣
之後入lift的人就要層層停。

係未足一歲時既大年初一，渣住架學行車衝到去神主檯前面，一手渣熄左支長壽香…！
結果全家上下大為緊張，呢頭要令我唔好再大喊，果頭又要為神主係咁道歉，
呢道創疤而家永遠刻機係我隻左手度…

之後既伯厭野簡直係多籮籮，放左幼稚園避開屋企人，自己一個走落條四百幾級既長樓梯，
落到下面既巴士站睇巴士，等佢地搵我搵左成個鐘，最離譜既係我見番佢地，
我係笑而唔係喊…

大個左少少，又試過上巴士入錢時，有意無意之間推一推錢箱既把手，
又試過為左想睇下 lift 槽究竟係點，試過好多次自己一個搭 lift 時拉開隻門黎睇…
（奉勸各位…大哥哥曳還曳，大家咪試呀，好危險架！）

讀幼稚園時，試過把家中不少細小物件掉落街。
在酒樓拿點心印去一格一格去印。

又試過為左想睇下 lift 槽究竟係點，試過好多次自己一個搭 lift 時拉開隻門黎睇…
（奉勸各位…大哥哥曳還曳，大家咪試呀，好危險架！）

若果隻門用手推得開的話，即是部lift有問題，機電工程署可以隨時檢控lift擁有人及維修者。

[ 本帖最後由 superay 於 2006-3-12 23:12 編輯 ]