新巴城巴唔出月票=不思進取？

最近有人話，點解新巴城巴不思進取，唔肯出月票。
其實有冇諗過對新巴城巴而言，月票係不切實際嘅呢？

新巴城巴嘅路線主要集中喺港島區，以及有不少過海路線。新巴另外有西九龍、將軍澳兩個路線專營權，城巴就有機場及北大嶼山對外、深西快線兩個路線專營權。

睇翻港島區，其實收費唔算太過分，如果要設立一個月票係貴路線巴士公司唔會虧蝕、平路線市民亦都有機會受惠，其實係有一定嘅難度。260 vs 10，兩者嘅收費差距達到三倍，究竟要點樣做先至可以令到兩邊嘅市民都有得益呢？

又睇下機場同埋北大嶼山嘅對外路線，現時如果即日來回，機場A車係已經有優惠，機場員工亦都有優惠。而S線同E線，以前者嘅收費，如果要去到有優惠嘅地步，相信至少要半價啲人先至會寧願買月票，但係去到依個地步巴士公司就會蝕。而後者，其實收費差距都唔細，同樣 E21 vs E22C，可以遷就邊個？

我哋都可以睇返過海路線，過海路線我會分為兩種，一種係市區往返市區，另一種則係新市鎮往返市區。市區往返市區嘅過海路線收費介乎$8.40(301)-$11.00(970)，的確係有能力做到月票，尤其是九巴都唔介意淨係自己班次做，新巴城巴亦都唔介意對方搶客，咁嘅話就算立場倒轉相信九巴都唔會反對，亦都冇能力去反對。而新市鎮往返市區嘅路線自己設立一個月票，亦都係唔可能的，我下面會再詳細講。

至於西九龍區嘅路線收費如何，大家有目共睹，都冇咩必要解釋。而將軍澳區嘅路線的確收費比較高，係有能力做到月票嘅，但係一樣我下面會再詳細講。

而剩低嘅深西快線，坦白講本地香港人有幾多個會即日來回？即日不停來回嘅又係咩人？相信巴士公司亦都唔會願意放過依個賺錢嘅大好機會。

上面我的確只係拋咗堆問題，因為呢個先至開始正文。

冇記錯，九巴當時亦考慮到呢啲問題，所以係打算推出幾款唔同嘅月票。市區可以用一個平啲嘅價錢坐市區路線，而新市鎮往返市區亦都會因應地區而提供另外幾種嘅月票。問題係運輸署反對，並且要求佢只係提供一種月票。而九巴喺權衡輕重之後決定以大西北嘅價錢去推出一個唔知優惠咗幾多個月票。推出之後其實喺網上面唔同嘅討論區都可以見到，有唔少沙田、馬鞍山及大埔區嘅居民其實都有微言，覺得呢個優惠係對佢冇用。而市區以及將軍澳、葵青嘅居民，更加係覺得九巴再進一步忽視佢哋。成件事入面得益嘅就只係得大西北，雖然咁講好似好過分，但係呢個做法某程度上係加劇咗地區分化同埋矛盾。

試諗下如果喺同一個situation，新巴城巴推出一個以北大嶼山對外路線以及新界西過海路線為標準嘅月票，試問大家又接唔接受？相信大家一樣會嘈到拆天。運輸署亦都開講明只能夠得一種月票，唔可以視乎地區而提供唔同嘅月票。莫非新巴城巴要好似九巴咁樣忽略某啲地區先至公平咩？

其實新巴城巴由好耐之前已經提供一個對大部分地區都好有用嘅優惠，叫做即日回程優惠。依一項優惠嘅好處係唔需要理會條路線本身收幾多錢、係貴定係平，因為回程都一樣有優惠。雖然佢有個通病，就係對於短途平價路線而言，優惠唔係太明顯。但係總好過推出過不倫不類嘅月票，以及只係得小部分地區受惠而大部分地區冇得受惠嘅月票。

所以我喺度希望各位爭取新巴城巴要出月票嘅人士，又或者打算用各種方法迫使新巴城巴推出月票嘅政客，不如試下反思一下，究竟應該要去推出一個不倫不類嘅月票，定係要推出過全面且各區都能夠受惠嘅即日回程優惠呢？

想當年，將軍澳區唔算太多人坐巴士嘅時候，新巴都曾經推出過即日回程優惠。結果多咗幾多人坐巴士、後來幾多人習慣咗坐巴士，相信大家應該仲有少許印象。究竟要解決現時客人流向地鐵呢個問題，應該推出過唔理你之後會唔會坐總之收咗一筆錢先嘅月票，定係吸引到市民來回都坐巴士並養成習慣嘅即日回程優惠比較有效呢？

歡迎討論。

月票的意義是任搭,如果我係巴士公司,當然想你買月票
博你回唔到本

好似電車,月票200蚊,起碼要搭86程電車,一日起碼搭3次

反而新渡輪月票就真係平左,不過講明每日來回各一次慢船

對巴士公司而言,無理由逐條線出月票,但玩優惠就無任搭意義,呢D LIMITATION無辦法

新城無出月票的誘因，就算出，亦都唔見有好大吸引力。

***********
但當對家出左月票，仲可以用係隧道線，對新城的衝擊有幾大，好難估計，要睇下未來呢大半年的客量變化先知。

例如：
1. 962、969系 vs 960、968 <-> M、X線
2. 紅隧口 <-> 港島叫幾飛（如去北角可任揀102、106，但買左月票會唔會專登等老九果架先上）
3. 307梅花間竹式班次

話說李月民要求城巴盡快出月票，城巴答會積極考慮推出類似優惠

都話九巴已經唔係九龍巴士有限公司，改名做西北巴士有限公司，簡稱西巴比較貼切，樣樣政策都西過人，只會偏幫大西北，多年來各式各樣的優惠都係大西北著數晒

九巴近日先趕上渡輪 港鐵整月票, 上市只係幾日城新就受靶.

人地渡輪有左月票幾十年, 港鐵全月通十幾年貨仔, 九巴堂堂全港最大巴士公司, 客運公交市佔咁高都只係推出左幾日, 然後就被比較話城新不思進取, 啲邏輯喺邊度嚟?

除非好似倫敦全市巴士畫一收費
好多地方巴士月票都係分區分ZONE
點解TD只批准巴士公司設一種月票?

kingprowm 發表於 2018-3-7 00:15
都話九巴已經唔係九龍巴士有限公司，改名做西北巴士有限公司，簡稱西巴比較貼切，樣樣政策都西過人，只會偏 ...

叫政苦響青衣起多幾廿橦公屋囉
到時要咩有咩囉

其實大西北冇你想像中咁多條線可以玩到月票
月票主要都係比新界過海線/大西北東九線用
來回程起碼要比$30以上先至叫回到本
-----
如果真係限死左一間公司只可以出一種月票既話，咁唔出好過出啦
又唔係個個人可以咁玩
-----
其實「搭X送一」又得唔得呢?
每個收費區間搭夠指定次數(例如10次)就可以免費1次

運輸處只准推出一款月票？有無來源出處？