本帖最後由 okt05032 於 2020-8-13 20:11 編輯
背景:
小弟係2020年1月8號坐國泰由香港飛阿姆斯特丹。呢份報告除咗介紹我呢班機外，亦都會介紹埋Plaza Premium First Lounge。
航班編號：CX271
飛行日期：08-01-2020
座位：31K 機型: A350-1000 註冊號: B-LXD
飛行時間：11小時27分鐘
計劃出發時間STD/實際出發時間ATD：00:50/01:30 GMT+8
降落時間：05:57 GMT +1
Plaza Premium First Lounge Review：
雖然PP First 已經開咗超過一年，不過今次係小弟第一次入去。旅客只要有指定信用卡/貴賓室會藉加250蚊就入到去。另外坐VS Upper Class，LH First Class，LX First Class同 AY Business Class 都入得。再唔係比全費入去都得。
一入到去你就會見到一個好大嘅酒吧，餐酒、烈酒、雞尾酒當然有啦。如果要求高嘅可以加錢要其他酒。酒吧另一邊就係咖啡茶吧。作為First Class Lounge，佢地就選擇 TWG茶葉 同 LAVAZZA咖啡。個度亦有多達8種甜品選擇～
小弟就叫咗壺Moroccan Mint Tea，係一種好refreshing、帶有濃烈薄荷味嘅綠茶。配上raspberry tiramisu 同柑橘啫喱可以中和到佢地嘅油膩或者突顯佢哋嘅甜味，簡直係絕配。
Plaza Premium First Lounge最大嘅賣點係有 a la carte。貴賓室餐廳有兩個menu，一個係主菜menu，另一個係前菜、餐湯同亞洲特色menu。由於小弟係用信用卡加錢入去嘅，所以就只可以叫一樣主菜，但係其他就可以叫多過一樣。
小弟食完嘢就出咗去休息區坐陣，一邊休息區放咗好多梳化配插蘇，另一邊就放咗幾張貴妃椅、報紙雜誌、同自助水吧。等轉機嘅可以訓一陣先上機。
客人係Plaza Premium First 可以享用10分鐘嘅Massage。Reception職員會主動同客人登記。不過都好多人預約，所以小弟建議預留時間。幫我按嘅師傅都好有水準，按得夠力外亦都好到位。就算只係10分鐘都已經將我嘅酸痛按走唒。
CX271 review：
小弟今次乘搭機齡1年4個月嘅B-LXD由香港前往阿姆斯特丹。由於經濟艙超賣，小弟好幸運地被升級上Premium Economy Class。成個PEY Cabin有32個位配一個洗手間。當日係全院滿座。
小弟坐低後空中服務員就向客人派熱毛巾同welcome drinks。毛氈、枕頭同Amenity Kit 已經預先放咗喺位上面。Amenity Kit放咗牙刷，牙膏，耳塞，眼罩，同埋一對襪。之後小弟就收到對耳機同今日嘅餐單。
A350-1000配備32個Collins Aerospace MiQ 座椅。客人可以享用40吋嘅pitch同18.5吋闊嘅座椅，後傾角度亦高達9吋。座位亦配備12吋嘅Panasonic Ex3高清IFE。因為比較闊落啦，就算前面嗰客人較到最斜都可以係出到去，唔洗叫隔離嗰客人借借。放埋個枕頭係頸部就可以人舒舒服服咁瞓。
長途豪華經濟艙嘅晚餐頭盤係吞拿魚沙律,啲材料就冇乜點調味，咁所以食落口嘅時候就好淡，而且個碗底都有好多水。主菜有3個option，分別係鮮茄魚柳,燒羊架同埋長通粉。小弟就選擇左燒羊架。個羊假整得啱啱好，一啲都唔乾，雖然成個主菜啲調味都唔係好夠，不過都令小弟印象深刻。飯後甜品除咗有朱古力之外，亦都有溶溶地嘅Movenpick雪糕。所以小弟食咗一個就冇再添食啦。 食完餐飯之後每位客人都攞到一支鑽石能量水
係空中廚房嘅小食盒
開始派早餐時前，空姐就開始派嘢飲比乘客。小弟就揀咗杯蘋果汁。
而早餐就有兩個選擇，分別係西式嘅香草蛋批同埋點心拼盤。兩個選擇都有牛角包同埋水果同埋乳酪。小弟就揀咗西餐，出奇地啲焗豆同埋煙肉啲香腸好充足嘅調味。反而個蛋批食落去一啲蛋味都冇，連芝士都唔覺有。同埋跟餐個杯咖啡超級難飲，好似飲緊水咁樣一啲味都冇。所以小弟落到機之後都要飲多杯。
總結:
整體來講，小弟都好滿意今次嘅航程，特別係PP First Lounge，下次有機會飛嘅話小弟都想抽時間入多去一次。而今次呢一個意外upgrade都令我呢一次旅程得到一個好嘅開始。雖然飛機餐嘅質素仍然有待改善，不過張凳都係好舒服。亦都令我對CX PEY留下一個好嘅印象。
小弟比較少寫飛行報告，請各位多多指教，謝謝。
| 
