過期貨品事件簿 (多間分店發現同款過期高鈣低脂牛奶)

超市店內廣播：
本著不斷進取,尋求突破o既精神
我地樂意用更全面,更主動o既方法
為你提供更優越o既服務及貨品質素
如果你o係任何分店發現過期貨品
我地會即時奉上首選牌泰國御品香米 500g 一包
有左你o既支持及參與,我地o既服務質素將會更好
詳情請參閱店內海報

本文志在讓各位板友分享o係超市店內發現過期貨品o既經歷
歡迎其他板友講述搵到過期貨品後拎米o既經驗
若果大家對此計劃有任何疑問,不妨交流一下


發現第一件過期貨品
三月初o既時候
一款已經告別超市o既貨品"家樂牌享一刻(各款)" (而家仲見好多巴士車身有呢款產品o既廣告)o係全線分店都只係賣$3一盒
o個個星期本人就買左多款味道試飲

本人好多時買o既野都唔係即刻食
通常會o係貨架到拎一件遲o的先到期o既貨品
有一日黃昏時間o係長沙灣一間分店想買田園鮮蔬呢款味道
就o係貨架搵件遲o的先到期貨品o既時候
發現其中一盒田園鮮蔬 4包裝係過期
於是就拎埋呢盒過期o既家樂牌享一刻田園鮮蔬 4包裝通知收銀員

收銀員睇過日子後就按救命鐘通知經理
由於當日店內鎮店之寶"首選牌泰國御品香米 500g" 缺貨
超市亦無售賣其他牌子o既半公斤米
最後經理俾左一包首選牌金牌糙米 1kg (原價$16.9) 代替
今次除左係額外賺多半公斤米之外,糙米價錢亦較普通白米為高


溫馨提示
由於本人一向與過期貨品十分有緣
因此只會記低一o的較為難忘o既經歷
想知過去咁多個月曾經遇到o既特別事情(包括與HKiTalk板友一齊搵過期貨o既經歷)
就要密切留意

[ 本帖最後由 bigfish_hk2 於 2006-12-31 23:19 編輯 ]

家樂牌享一刻？
係咪綠色包裝架？

已經無出拿？

原帖由 1005 於 2006-11-26 10:51 發表
家樂牌享一刻？
係咪綠色包裝架？

已經無出拿？

家樂牌享一刻就係綠色包裝o既杯湯,官方稱呼呢款產品為熱飲小食

呢款產品已經 delete 左成半年有多
自從o個次賣$3一盒之後,好多分店o係四,五月已經冇賣呢系列產品
六月o既時候本人罕有地o係港灣豪庭間好運來超市見到o的七月到期o既田園鮮蔬
不過佢地最後都o係到期前執走呢o的家樂牌享一刻

除左田園鮮蔬之外,呢個系列仲有香辣豆腐火鍋,黃金玉米,熱辣海鮮,忌廉磨菇
而家已經全部消失於貨架上



同一分店發現兩款可樂公司過期汽水

日期:3月11日(星期六)
時間:大約四,五點
地區:中環

可樂公司產品一向熱賣,旗下多個品牌o既炭酸性飲料市埸佔有率有近八成之多
絕對係領導地位唯有
由於對自己產品銷路有信心
佢地品牌汽水o既最佳飲用日期都係由生產日期起計365日內
唔似得其他汽水好似七喜,百事,新奇士咁樣有成接近兩年時間o既最佳飲用期

呢日去到中環一間分店
見到o係賣餅乾o個條街o既頭尾推廣貨架上有兩款芬達 500mL 膠樽裝o既汽水
一款係蜜桃味,另一款係士多啤梨味

由於本人對可樂公司出產o既飲品比較留意
再加上好似好耐都冇o係其他分店見到芬達蜜桃及士多啤梨汽水
於是就抱著好奇o既心態拎起一支黎睇下個日子
見到樽蓋上o既日子已經過左成個月有多,再睇下隔離另一款味道o既日子又係過左兩,三個星期
再睇下呢個推廣貨架上o既剩餘汽水原來全部都係過期

於是就每款味道拎左幾支俾收銀員睇睇
收銀員表示唔好意思後就通知經理
由於發現兩款貨品過期
經理就雙手奉上兩包首選牌泰國御品香米 500g 以表謝意 (留意係雙手奉上,唔係求其用單手俾顧客)

貨架上十幾二十支芬達汽水全部都過期
究竟係可樂公司定下o既保存期太短?
抑或係超市入得太多貨引致賣唔去呢?!

溫馨提示
芬達蜜桃味以及芬達士多啤梨味汽水都係告別超市貨品
呢兩款汽水本人從來都未飲過

[ 本帖最後由 bigfish_hk2 於 2006-12-4 01:21 編輯 ]

請問芬達蜜桃味以及芬達士多啤梨味汽水係點 o既樣架？

熱辣海鮮味杯湯唔知好唔好飲呢?

原帖由 garyfirst 於 2006-12-11 19:59 發表
請問芬達蜜桃味以及芬達士多啤梨味汽水係點 o既樣架？

芬達蜜桃味以及芬達士多啤梨味汽水可以o係一個介紹汽水o既網站搵到
http://www.hkbeveragecollect.com/soda_fanta.htm
網站可以搵到罐裝包裝o既芬達蜜桃味(粉紅色罐)以及士多啤梨味(紅色罐)汽水



收銀員懷疑店內有過期大半年喉糖

日期:3月底
時間:晚上大約七點
地區:佐敦,油麻地附近

搵過期貨品送米呢個活動原意係感謝顧客協助超市職員發現過期貨品
究竟超市職員會唔會擔心有人渾水摸魚
靜雞雞攜帶並非店內售賣o既過期產品以圖牟取包米?
各位板友又信唔信超市售賣過期大半年o既貨品呢?

三月底一個晚上去到佐敦,油麻地附近o既一間分店
睇下有冇我之前o係其他分店曾經搵到o既貨品(例如早前提及o既家樂牌享一刻以及芬達楊桃味及士多啤梨味汽水)過期
睇過店內好多貨品都仲有一段時間先到期

正準備離開之際
去到個人護理用品o個條街睇下一款o係o個個星期特價買一送一$7.8 o既清適潤喉軟糖
竟然發現有一包過期大半年o既檸檬味清適潤喉軟糖

究竟過期貨品會唔會o係超市住左咁耐時間都冇人發現呢?
於是就睇埋貨架上呢款貨品
最後都只係得o個一件係過期
其餘o既貨係2006年9月或10月

其實通知收銀員之前都有o的擔心
職員信唔信有過左期咁耐o既貨品o係店內呢?
會唔會懷疑係我拎入去呢?

最初收銀員都唔係好信有過期貨品(可能佢地平時有o係貨架到執過期貨)
之後就按救命鐘通知經理

經理聽完收銀員o既說話後都覺得奇怪
不過佢地都冇理由懷疑顧客專登帶一件原價賣$7.8 o既喉糖去換包只係幾蚊o既米
最後都o係貨架上拎一包首選牌泰國御品香米500g 出黎感謝本人o既協助

溫馨提示
清適潤喉軟糖檸檬味已經告別超市
最後一批貨到期日子係2006年10月1日
另外,佢o既鄰居清適潤喉軟糖黑加侖子味就黎租約期滿
唔會再有新貨上架
好多分店已經溫馨提示顧客就黎冇得賣
究竟日後會唔會執到呢款過期貨就要密切留意

[ 本帖最後由 bigfish_hk2 於 2006-12-17 23:50 編輯 ]

原帖由 2ac 於 2006-12-11 20:11 發表
熱辣海鮮味杯湯唔知好唔好飲呢?

熱辣海鮮味杯湯味道一般
本人都係比較鍾意飲黃金粟米



多間分店發現同款過期高鈣低脂牛奶

日期:3月底
地區:中西區

三月底o既時候
本人o係中西區一間分店見到貨架上有好多件首選牌高鈣低脂牛奶 250mL 六包裝過期

之後就隨意拎左兩件出去收銀處
收銀員見到有兩件過期牛奶後就叫人拎兩包首選牌泰國御品香米500g 出黎

根據店內海報細則詳情
顧客發現多件相同款式o既過期貨品只係獲得一包米
由此可見,職員並不清楚呢個活動詳情
若果當時我係拎左五件出去收銀處,豈不是可以得到五包米?!

之後本人去左區內另一間分店
又發現呢款首選牌高鈣低脂牛奶 250mL 六包裝過期
通知收銀員o既時候
佢問我駛唔駛拎過一件冇問題o既貨品俾我 (仲諗住我係想買呢款牛奶)

本人並無興趣購買呢樣貨品
只不過係諗住協助超市執過期貨獲得獎品


溫馨提示
若果大家o係超市發現某款過期貨品
不妨o係呢段時間去其他分店睇下
唔排除有機會o係另一分店都搵到同款過期貨品