謝謝問題，逐點回覆:
1. X720應該無咩可能加到價，雖然返東區快咗好多，但係去中環快少少下無啦啦加價唔太可能
A. 車程係穩定左的，$0.8幅度亦不算大。若技術可行，我會建議往中環方向收$7.4，往筲箕灣方向收$8.2。(當然目前未有先例，而新成街開始$7.4分段亦不太理想)
2. 唔get 723 去半山果程做緊啲咩，有冇人會比$11.2 灣仔落車係一個問題；同埋上半山行紅棉路定係入蘭桂坊？23唔行蘭桂坊；同埋鰂魚涌太古去半山繼續無車
A. 去半山主要係想做3類客源: 筲箕灣/西灣河>半山區, 愛秩序灣/鯉景灣>灣仔/金鐘, 金鐘>半山區(取代12M)。我認為$11.2去灣仔係偏貴，所以特意在愛東商場開始設$10.3分段。$10.3可以港島民生書院直出舊灣仔警署，對鯉景灣來說算係值得畀。當然，有意見認為723收$11.2過貴，可以考慮再下調一級，全程收$10.3，愛東商場分段收$9.1。至於上半山果段因為改過設計，冇update番文字地區描述。現時已經改番係跟23上山，太古廣場、香港公園、堅麗閣、明愛中心的行法。鰂魚涌太古去半山冇乜辦法，因為收得人$10.3，要西灣河上橋先值，但係鰂魚涌同太古用720/722轉車其實係十分合理，我都係想盡可能減少類似18X的由頭碌到尾行法。
3. 愛東好似全面加價，除咗18X短途分段之外，無啦啦俾多好多，甚至要俾$11.2去灣仔，比較難過關
A. 2號提速收$6.3，兼且加到15分鐘一班，而且去灣仔同中環係唔慢的，加價幅度同速度增長幅度係成正比。我亦都唔認為愛東攬住條又慢又疏的2號，對佢地來講是有用的。愛東係呢個重組其中一個主力想提升服務，以及upgrade價錢牌的區域，因為離MTR都有少少距離。現時的巴士網絡對佢地來講吸引力非常欠奉，見住成班人喺B3/D2出口，步行來往愛東商場，東旭苑亦都有唔少人寧願行成15分鐘去搭鐵都唔搭巴士。善水想開源，愛東係其中一個可能性。(好似柴東班人因為巴士吸引力足夠，都明顯地出到客，而唔係行去柴灣站)
4. 25去中環嗰段，建議唔入中環內街落客，係干諾道中落客會快啲
A. 因為25落山係替代了26在勵德邨的服務，我都係想方便番人口老化的勵德邨客，所以跟26停番內街，而且琳寶徑/皇后大道中都唔見得係暢通。有時海旁的站太遠，亦都係推左班中環客搭小巴轉鐵。當然，呢類細節可以落地果陣同區議員傾下，睇下佢地想點。
5. 2去中環唔明點解要入港灣，行外告士打道唔係仲好？灣仔內街班客唔駛死等 新5
A. 因為2號在這個計劃入面係同18合併的，港灣道去上環冇得真空，所以2號係做返18的炮北/港灣道>上環客的同時，服務番2號的大坑客。而2號因為入左大坑，所以飛走百德新街慳番5分鐘行車時間，令2號在北角、炮台山、大坑都同時有吸引力。灣仔內街班客除了5，還有海量的1/5B/10/37A之類的流水服務，相信班次是十分充足。
6. 建議18P晚間班次直行電車路去銅鑼灣，起碼停到怡和街
A. 我自己都掙扎了不少，考慮了3個方案，分別係
a) 清風街天橋>百德新街>景隆街>利舞臺廣場>紀利華木球會>北海中心>舊灣仔警署 (建議方案)
b) 清風街天橋>百德新街>景隆街>堅拿道東, 駱克道>馬師道, 駱克道>舊灣仔警署
c) 清風街>...>怡和街>堅拿道東>北海中心>舊灣仔警署
最後揀了A方案的最主要原因，係18P現時百德新街真係晚間客倉，有唔少人特登等佢，而百德新街食街果邊去銅鑼灣站的步行距離唔算近，想保留番百德新街呢個站。另外係景隆街、利舞臺、木球會、北海中心，呢4個站，其實附近都有大量的消閒熱點，而係行番去銅鑼灣站有一定距離。18P呢個行法係特登避開番銅鑼灣站，希望吸引啲唔願行去MTR的懶客。怡和街反而同MTR係打得最正的一個站，所以先至用A方案。
7. 羅便臣道行唔行到？睇落都幾窄
A. 13號旭龢道頭車，由車廠私牌過去係行全段羅便臣道西行。而我建議的走線係特登唔行介乎羅便臣道及列堤頓道之間的一段柏道，因為實在太窄。巴士公司亦曾在2003年及2008年提出過西摩道>羅便臣道西行的走線，因此我認為若45限制行短車的話，係可以按這條路線行走。
8. 唔明開45嘅用意
A. 45可以當係40M的短棍，唔去華富，改落去堅尼地城，配合番40唔落灣仔，所以45係做 堅尼地城<>半山區<>中環<>金鐘<>灣仔北 的流水角色，亦都係補番12M/40M取消後，12/13/23/723填唔晒的窿，包括 全段堅道東行>中環/金鐘/灣仔, 金鐘/蘭桂坊/堅道>英華女書院, 蘭桂坊>香港大學東閘。原本係諗過擺蒲飛路，但其實堅尼地城來往半山的交通一直都沒有直達服務(除了早上不定時的上路紅小之外)，但兩地之間的學生以及人員往來係足夠令只係服務到各一半路段的12/45A小巴生存，而兩條路線的服務都頻密，但12小巴卻一直被中西區居民投訴服務欠佳，用車殘舊。45就正正可以填補到12同45A小巴的不足。45落堅尼地城的另一方面係想爭取半山區支持重組，始終計劃入面都係有削減用車的成份，提供新直達服務係一個誘因令佢地支持重組。另外45西行走線都係屎忽數，可以同12開聯合班次然後各30分鐘一班。沒有45，12就要開20分鐘一班。亦確保西摩道有服務的同時，羅便臣道東部的居民要落金鐘灣仔，唔想等30分鐘一班的12就要upgrade搭23。
9. 4洗唔洗入中環碼頭？去中環碼頭有4X，同埋而家假期4X唔開，4/4X用車個條數應該要改
A. 4入中環碼頭，因為想補番2號原本做緊的中環碼頭平價去金鐘站以及金星大廈的服務，亦都係美其名為西營盤之學生提供多一個選擇去中環碼頭。4X開埋星期日係為了博取華富支持。假期而家4號開15分鐘一班，一轉連休75分鐘，派5部車(晚間4部)。71開30分鐘一班，一轉連休120分鐘，派4部車。重組後，4X開20分鐘一班，派3部車，4號開30分鐘一班，派3部車。埋單係慳到3部車(晚間慳2部)。
