[2009.10] JL8730 香港>羽田、JL735 成田>香港

前言
各國陸續放寬邊境管制，海外站友已有新的飛行報告發表，但香港入境仍需隔離，一般香港人想去旅行仍然有難度（自從4月放寬海外港人入境及5月起所有海外人士都可入境，已打針者檢疫減至7日，即使比較麻煩都至少係可以入境，只要唔係幫人打工都可嘗試外遊，算叫做向繼續開放踏出一步）。手上仍有幾篇陳年飛行報告，出埋之後希望唔使再望梅止渴。

2009年碩士畢業，未搵到工，朋友同我去日本旅行，行程包括上高地、松本城、十日町、越後湯沢、新潟果園等。朋友負責訂機票，安排回程坐747上層，每人來回連稅$3,261。

是次旅程之前已分享巴士篇、鐵路篇 1 2 3，今次補回航空篇。當年雖然都鍾意飛機，但認識無而家咁多，唔係影落好多相，後來去得多，加上網上資料易搵才作更多嘗試。話說到目前為止我只有兩次旅程搭過日航，另一次係2001年跟團，搭DC-10-40到關西，行程中搭夜船由大阪往九州，然後在福岡搭B767-300ER返香港，當時未有數碼相機。

去程
日期：2009-10-17
航班：JL8730
時間：01:35 HKG – 06:45 HND，表定航程約為4h10m
用機：B777-246ER JA701J，2002-06-29首飛並於同年7月交付日本航空，後來於2012-03-31在羽田機場機尾擦地，2012-06-29重投服務，成文之時仍在服役。

▼第一次搭凌晨機，夜晚十點幾到香港T1，當時羽田重新開放台灣以外國際航班不久，顯示屏只稱為「羽田機場」而非「東京/羽田」。


▼本次航班用機，2002-2011年期間日航採用「日弧」塗裝。


▼夜麻麻，個赤鱲角真闊。



▼瞓又唔係醒又唔係，早餐食粥算了。


▼全日空/Air Japan B767-381ER JA610A，2003-04-15投入服務，成文之時仍在服役，日本人似乎對飛機好長情，十幾年前影落的飛機好多都未退。


▼當時國際線大樓係T2南面一座獨立建築物，後來經過改建，現已成為T2一部分。2015年再搭凌晨機時，則使用西面逾1公里外的新國際線大樓。


▼當時國際線大樓無鐵路接駁，必須搭巴士，有免費循環巴士順時針行走T1＞T2＞國際線大樓＞T1之間，因此雖然國際線大樓地理上最接近T2，但抵埗旅客最快到達的是T1。


▼等巴士，後來改建後此位置已面目全非，變成辦公大樓停車場。


▼披上Eco Jet塗裝的B777-246 JA8984。現時除非係機場員工，否則冇乜可能站在同一位置影呢張相。


▼搭巴士去到T1



▼搭單軌入市區

行程首站係松本，我地搭凌晨機到，要等新宿駅綠窗口開門先可以買pass，搭10:00的特急，大約中午去到松本。如果係一般日機，成田降落，搞完入境及轉車，去到松本已經夜晚。松本市位於日本阿爾卑斯山脈（即赤石山脈、木曾山脈及飛驒山脈）之間，旅遊資源豐富，市內有松本城、淺間溫泉及上高地，亦係前往黑部水壩、長野市的門戶。長野縣唯一民用機場亦位於松本，只有往札幌、大阪（季節性）、神戶及福岡的航班，除大阪由JAL派機外，其餘由Fuji Dream Airlines營運，該公司以Embraer E170/175為主力，國外遊客除非特別想試否則都幾難用到。

當年網上旅遊資訊唔多，日本鄉郊亦未算大路，我地係買好機票之後再諗行程，只知要去十日町搭HK100同683系Hakutaka，好彩家人之前在2004年買了一本涵蓋東京至大阪的中日本詳盡地圖，由東京一路掃上去的行程都係睇住本地圖諗（當時Google Maps非常簡陋）。見到松本市郊有個「上高地」，未聽過喎，一於去見識下。以為自己算係先鋒，上到去發現縱Ｘ遊已經有團。

▼發源自飛驒山脈槍岳、流經上高地及大正池的梓川，在松本市西郊由奈川渡水壩攔成梓湖，用作水力發電。梓川下游匯入信濃川，於新潟出日本海。


▼燒岳


▼大正池



▼田代橋


▼上高地溫泉酒店（左方紅色）及上高地Lemeister酒店（右方白色）


▼穂高橋望向明神岳。我用街景圖比對，發現雲層只遮了山頂一小部分，但舊雲令人以為山峰比現實更高。


▼河童橋回望燒岳


▼河童橋望向岳沢，穂高岳在雲中。此次訪上高地係我去日本自由行第一個自然類景點，雖然天氣未如理想，但環境優美，驚為天人，從此愛上日本山水，2018年再次帶家人來訪。兩次都未能一窺穂高岳全貌，將來若再有機會到訪，希望遇上晴天，可能要住上高地入面的酒店。


▼棲息於上高地的綠頭鴨，據稱不會遷徙。


▼松本城



▼天守遠望





▼城外紅葉





行程後半係去新潟縣，新潟縣有兩個機場，分別位於新潟市及佐渡島，但佐渡島機場現時無定期航班。2018/19年時，我曾經諗住搵次過台灣搭遠東航空MD-82/83去新潟，可惜後來疫情爆發，一切已成泡影。

▼烏冬餐廳


▼新潟市 南区 白根 田園景色





▼白根葡萄園

回程
日期：2009-10-22
航班：JL735
時間：18:20 NRT – 21:55 HKG，表定航程約為4h35m
用機：B747-446，編號不明

▼搭253系Narita Express去成田機場T2



▼當年前往T2的96號閘口要搭無人駕駛，此無人駕駛在2013年改為自動行人道。


▼停機坪一瞥


▼到達閘口，隱約見到部747就在眼前，但隔住玻璃，相機感光唔夠，又無法靠近貼住影，遺憾地無為日航747最後歲月留低記錄。


▼唔係好多間航空公司在747上層設經濟艙，日航係其中之一。窗邊儲物櫃放得落成個背囊，大鄉里的我嘖嘖稱奇。


▼晚餐食咖哩牛肉飯


▼返到香港都冇影到架機外觀，本應隆而重之的首次747上層體驗就此草草收場。實體登記證唔知點解無留低，好彩有一張影印本，見證曾經搭過747上層。


▼在某網站（http://www.aviationexplorer.com/ ... seating_charts.html）搵到當年的seat map，有三款都在上層有row 76，唔知係邊款。





這次旅行前一年我才剛搭過國泰747飛德國，對即將來臨的747退役潮毫無知覺，幸好朋友安排搭呢班機，否則都幾難有機會坐747上層。日航747在不足兩年後全數退役，而國泰747客機亦在六年半後退出歷史舞台。下回將會係我的國泰747最後體驗，有多少少飛機相（唔好抱太大期望 ）。

後語
我腦海中，2007.05、2008.06及2009.10三次旅程係一個系列，代表我由學生、研究生到投入職場的心路歷程（2009.03去北京要特別摷先記得起）。最初發表陳年報告時並無特別計劃，本來只係諗住清晒近年同一部相機的旅程就算，但一路搵返舊相又別有滋味，發展下來決定將所有數碼年代的飛行相片都公諸同好，時序比較跳脫，飛機相唔係太多就加點旅程相，希望無悶親大家。

全日空/Air Japan B767-300ER JA610A，2003-04-15投入服務，成文之時仍在服役，日本人似乎對飛機好長情，十幾年前影落的飛機好多都未退。

都唔係啦，ANA 自己都退左一堆只得 12-13 年的 77W

樓主坐過 747 上層都算幸運了，我一次都無坐過，坐過咁多架 747 除左一架之外全部都係上層全商務艙