[2023.04] HX640/641 香港<>福岡 首航禮 + 國內線 spotting

前言

可能係我歷來最瘋狂的一次。

早前買了 5 月尾機票打算周遊九州，但有家人只能在紅日出埠，故計劃趁復活節 4 日假期去多一次福岡。3 月 13 日朝早，家人在旅遊專頁見到香港航空宣布於 4 月 7 日首航福岡，立即叫我按指示去永安網撲機票，當時官網未開售。一路睇一路有人話已滿額（應該係指跟旅行社集體購票滿額），亦都心知佢出 A320 唔載得幾多人，搞到我要好急做決定。紅日加首航始終較貴，為節省支出，一行 6 個人，買一套 4 人無行李 $25,992 及一套 2 人連每人 30 kg 行李 $14,470，當時所見沒有中間選項。畀晒錢之後，到黃昏才知道官網開售，六千幾蚊包 20 kg 寄艙行李，吹脹。

寄艙行李得 60 kg，去程都可以，回程一定唔得。港航系統可在訂票後加購行李，於是回程加購 20 kg，盛惠 $365。每位有寄艙行李的乘客最多可以寄 2 件行李，我地有 3 個名額，最多可寄 6 件，總共 80 kg，出發前全部要秤清楚。預訂過程中發現可以畀百幾蚊買熱飯，否則 default 食麵包，但去日本都唔恨佢個飯，所以就唔加喇。

由出票到出發只有 25 日，話咁快就要準備起程。出發前 48 小時試做網上 check-in，舊年都未有得做，今次就可以喇，更可以預先做埋回程，人在外地盡情玩樂唔使計住時間又唔使怕無訊號。訂單中較平機票唔包免費揀位，要每位每程 $115 選位費，為免被拆散所以都係課金。全部支出除返開每人平均 $6,958，雖然比起平時貴好多，但都儲落三年錢，陪下老人家冇得計。反正日本各主要區域，我隔得最耐未重返就係九州，今次唔使我編行程，先熟習購物點，下次就唔使搵。

去程
日期：2023-04-07
航班：HX640
表定：10:25 HKG – 15:00 FUK，3h35m
實際：10:21 HKG – 14:40 FUK，3h19m（後推至埋閘）
用機：A320-214 B-LPQ，同上次去大阪一樣


▲放寬限制後首個長假，機場人流暢旺，搭的士都要排一陣隊先落到車。


▲甚麼口罩令、疫苗通行證全部已成歷史


▲終於可以用比較愉快的心情欣賞機場


▲K 區旅途由此起 (pun intended)


▲機場增設行李磅，推廣自助登機。我 2019 年從 LHR 登機時已經係完全自助，香港算做得比較遲，疫後人手不足就大條道理。


▲話晒都係首航，港航安排多名職員指示乘客，我地大約在起飛前 2 小時到達，無人排隊，幾分鐘內就完成登機手續。聽到旁邊另一個 4 人組合無預先揀位要拆散坐，慶幸我地有課金。


▲港航職員影相


▲今次北面離境閘都重開


▲同行多老人，落去抵港層食太興早餐。


▲復活兔


▲航班多返


▲HX640 在 24 號閘


▲上返離港層近南閘，就由南閘走。右邊好多人排隊，左邊成列機冇人用，我地梗係走過去開齋。



▲大約 11 分鐘完成安檢及出境


▲某免稅店有半架的士


▲24 號閘在主樓天際走廊旁邊，好快就到。


▲終於影到更新後的「打卡柱」


▲抵達時為 09:48，旋即開始登機，唔止影唔到其他飛機，連自己班機都影唔到全相。若非因機上膳食欠佳而要另外食早餐，應該可以稍早到達。當時公關活動已完結，上機時向每名乘客派發紀念品（後述）。


▲登機橋攝，知道同上次同一隻機就冇乜所謂。


▲旁邊的 A320-214 B-LPL 正準備起程，該機在 2014-02-28 首飛，同年 3 月 25 日交付，由 2020 年 12 月至 2022 年 6 月期間封存。成文之時，香港航空活躍機隊共有 9 架 A320-214 及 3 架 A330-343X。


▲今次自己劃位就盡量坐得前，在機翼前端位置，可以望住個引擎，而且無咁嘈。


▲174 座配置，背囊放上頭頂之後 legroom 尚算不錯。安全須知同上次一樣就唔放喇。


▲10:17 登機橋收起，10:21 後推。


▲首航關係，外籍機長用幾分鐘致歡迎辭，10:25 啟動引擎。同上次一樣，啟動引擎時好大陣燃油味，但可能因為唔使戴口罩，相對上冇咁難受。


▲工作人員揮手後於 10:27 開始滑行，背後係國泰 B777-367ER B-HNR 及 B-KQF。


▲長榮 B787-10 B-17807


▲中國東方航空 A320-232 B-1678


▲宿霧太平洋航空 A321-271NX RP-C4119


▲菲律賓航空 A321-231 RP-C9907


▲國泰 A350-1041 B-LXM


▲國泰 A350-941 B-LRV


▲客運大樓南側一列飛機


▲香港航空 A320-214 B-LPJ


▲國泰 A350-1041 B-LXH


▲國泰 A330-343E B-LPK


▲香港快運 A320-271N B-LCR


▲香港快運 A320-271N B-LCU，以上兩部機都係 2020 年接收。


▲國泰 B747-467ERF 起飛，放大隱約見到似係 B-LIA。


▲香港航空 A320-214 B-LPK，自 2019 年 2 月封存至今，機齡已 10 年。


▲國泰 A321-251NX B-HPB


▲國泰 A330-343X B-LAN


▲3 部 744F


▲其中一部係 Challenge Airlines B747-4EVERF OO-ACF，此機於 2007 年 8 月交付以深圳為基地的貨運業者翡翠航空，其後數度易手，現為第四手。


▲遠處的國泰 B747-467ERF 及 B747-867F


▲華民航空 A300F4-605R，編號好似係 B-LDB。


▲港珠澳金巴好密車


▲滑行 12 分鐘後於 10:39 從 07R 跑道起飛


▲起飛影片


▲機翼


▲引擎


▲起飛後 45 分鐘左右派餐，一支西藏水、一個咖哩牛肉包及一杯飲品，我都係飲蘋果汁。


▲個包既無咖哩味亦無牛肉味，只得鬆肉粉味。我無發現有其他乘客訂熱餐。今次空中服務員在安全示範時只須戴口罩及手套，而派餐時戴手套，口罩則有戴有唔戴。我自己日常生活基本上唔戴罩，去到日本都只係防吹風才戴。



▲日本時間大約 14:00，雲層轉為晴天，同時飛機亦慢慢降低高度。我知道編時間表通常預鬆，今次準時起飛、天氣良好，預計唔使 15:00 就會降落。果然，影完相後機長就開咪話開始 descend，並表示機場會安排 water salute。


▲此時已到長崎，圖中為長崎半島，中間對上隱約見到兩座小島，左邊就係列入世界文化遺產的「軍艦島」，原名端島，而右邊的中ノ島則設有當年端島居民的火葬場及納骨堂。


▲近處為三菱重工業地帶，遠處過橋後係沖之島及伊王島。


▲圖中有建築物之處，近海係豪斯登堡，後面係美軍居住地。


▲佐世保港


▲航機飛到九州北面右轉調頭，飛過海之中道。


▲圖中行車橋左邊塊地就係福岡第一飛行場（通稱「雁ノ巣飛行場」）跡地，1936-1965 年期間可供飛機起降，係戰前日本最大民用飛行場。該處現時仍設有福岡市消防局航空隊、国土交通省福岡航空交通管制部等航空相關機構，與福岡機場跑道位處同一直線。


▲西戸崎


▲博多港


▲日本海上自衛隊


▲博多港塔


▲此時航機在跑道西面，要到南面再次調頭。


▲有可樂廣告的是 Canal City，後方灰黑色大型建築物係博多駅。


▲JR 九州南福岡車両区及竹下駅


▲春日貯水池


▲春日公園


▲對正跑道進場


▲14:25 於 34 跑道降落


▲降落影片


▲披上比卡超塗裝的天馬航空 (Skymark Airlines) B737-86N JA73NG


▲日本航空 A350-941 JA10XJ


▲真航空 Jin Air B737-8SH HL8017





▲降落後在同一位置停了大約 10 分鐘等機場消防車到場，然後進行 water salute。


▲Water salute 影片，原片太多談話聲，我將條片在機長廣播後靜音。


▲14:40 埋閘，我地 14:45 落機，呢個位置都係好難影相，只能補回機頭一角。


▲該段時間 HX、UO、CX 三班機於半小時內接連到達，而 HX 係第一班，入境完全唔使排隊，15 分鐘已經完成入境手續到達行李輸送帶，行李亦好快送到。


▲落機後唔夠半個鐘已經出到接機大堂，當地拉 banner 迎接，福岡機場亦再派一份紀念品（後述），更有電視台訪問乘客。



▲我地等車去博多駅，圖中係去国內線大樓的免費接駁巴士。





▲由於國際旅客越來越多，機場引入 Benz Citaro G 掛接巴士，加強接駁巴士車隊。


▲從福岡空港国際線往博多駅，沒有地下鉄直達，一係搭接駁巴士去国內線轉地下鉄，一係搭直達巴士。直達巴士亦分兩種，分別係只來往博多駅及空港国際線的一般巴士（沿途不停站，但不設行李架），或行駛太宰府—空港国際線—博多駅的「旅人」高身旅遊巴（只限單程，由博多駅出發不能在機場落車），兩者聯合班次大約15-20分鐘一班，車費一樣係 270 円，以現時匯率約為 HK$16。


▲我地等到「旅人」，好處係行李可以放車底行李架，壞處係車上已有來自太宰府的其他乘客，我家老人先上座，後生放完行李只能企，若太遲更有可能連企都冇得企要返落車。入站時有車阻，所以影唔到正面；到博多時泊在人車分隔的室內總站，都係影唔到外貌。







▲FR24 航班資料及航線圖




▲紀念品分享：香港方面有環保袋、紙牌、保溫水杯、毛巾、膠牌匙扣、原子筆，全部係只此一次獨一無二的設計。




▲福岡方面有一個膠袋、兩個 folder、一塊博多織手帕、一包兩塊明太子仙貝及一支原子筆，全部係當地標準產品，並無香港元素。

由紀念品可見，港航對今次首航的重視遠大於福岡空港。這也難怪，福岡方面只係同一航點迎來多一間航空公司，但港航係從來無飛過福岡，以前同快運做姊妹就各有各做，而家要一個打兩個梗係博到盡。香港同日本都解除限制，報復式旅遊方興未艾（我就係例子），九州好多人鍾意去，但國泰同快運機位不足，呢個時勢轉機亦好麻煩，港航若手上有航權及人手，搶佔福岡這個大 port，好過死等尚未準備好重開國際線的二三線城市。

旅程第二日去空港国內線大樓購物，順便睇下飛機。


▲地下鉄直達




▲2017 年並無到國內線大樓，上次到訪係 2012 年，相隔 11 年，大樓內部已大翻新，同以前完全唔同。


▲日本主要機場的國內線大樓基本上都係大商場



▲據知福岡空港係日本最繁忙的單跑道機場


▲一列自助 check-in 機，最近鏡頭的天草航空 Amakusa Airlines 仍然只有一架客機 ATR42-600 JA01AM，2017 年時影過。


▲機身繪上海豚圖案


▲其中一個安檢區


▲上去 4 樓觀景台睇飛機




▲改建後的觀景台係以木板鋪地的大型平台，適合一家大細。


▲先望左邊，最近鏡頭係全日空 B787-9 JA936A，按之前影到的航班資料應為 9 號閘出發往東京羽田的 NH248。


▲後方由近至遠分別係：全日空 B787-8 JA811A、日本航空 B737-846 JA337J、全日空 A321-272N



▲樂桃航空 A320-214 JA09VA，VA 後綴反映原屬香草航空 Vanilla Air，隨公司合併加入樂桃航空。


▲右邊係日本航空 B787-8 JA848J


▲引擎


▲由近至遠：星悅航空 Star Flyer A320-214 JA27MC、捷星日本 A320-232 JA09JJ、富士夢幻航空 Fuji Dream Airlines (FDA) E175STD JA11FJ、樂桃航空 A320


▲樂桃航空 A320-214 JA821P


▲日本航空 A350-941 起飛


▲國際線大樓


▲釜山航空 A321-231


▲韓亞航空 A330-323X HL8259


▲濟洲航空 B737-800


▲國際線大樓北端擴建工程如火如荼


▲全日空之翼 ANA Wings DHC-8 402 JA463A


▲北海道國際航空 Air Do B737-781 剛到埗


▲聯合航空 B737-800 緊接起飛





▲全日空 JA936A 離閘連環圖


▲FDA JA11FJ 開始滑行


▲星悅航空 A320-214 JA07MC


▲長榮航空 B787-9 B-17883


▲泰國航空 A330-343X HS-TEO


▲韓國德威航空 T’way Airlines B737-8KN HL8354



▲FDA JA11FJ 起飛



▲全日空 A321-272N JA145A


▲全日空 JA936A 準備起飛


▲影片集合，影到 3 部起飛。逗留期間其實有不少航班起降，但觀景台有鐵絲網，追機比較難，唯一無鐵絲網的地方係一條樓梯，不過貼有告示不准拍攝，以免阻路。


▲天馬航空 B737-8AL JA737X


▲影完 JA936A 起飛，JA848J 開始上貨，我都要走了，在觀景台逗留大約 23 分鐘。




▲落返 3 樓，大樓外東面景色。


▲國內線大樓 3 樓為食肆，拉麵街亦配合航空主題稱為「滑走路」（即跑道），標誌有 FUK 字樣。



▲地面亦鬆上 16/34 跑道標記


▲食個天婦羅刺身定食


▲之後搭地下鉄去姪浜

回程
日期：2023-04-10
航班：HX641
表定：16:00 FUK – 18:35 HKG，3h35m
實際：15:50 FUK – 18:40 HKG，3h50m（後推至埋閘）
用機：A320-214 B-LPP，2016-03-09 首飛，同年 4 月 15 日交付香港航空，airfleets.net 資料顯示疫情期間無封存


▲臨走當日朝早悠悠閒食個早餐，之後搭巴士去機場。


▲香港航空在 B 區辦理登機


▲香港航空地勤由 Swissport 負責，安排了一名操流利英語的南亞裔地勤坐鎮，溝通非常順暢。港航雖然 hard product 比唔上，但 personal touch 可見有努力。


▲後加的 20 kg 行李要另外磅重，唔可以一次過 80 kg，好彩其中一個喼剛好係 20 kg，而我地所有行李總重量剛剛好。處理期間，電腦有點問題，所以總共用了 18 分鐘完成手續。可能時間尚早（抵達時為出發前 2.5 小時），未見明顯人龍。


▲擴建工程預計 2025 年年尾完成


▲福岡機場一樣加設大量自助 check-in 機，而且已取消以前夠鐘至推部流動 X 光機出來，檢查後才到櫃檯的安排。


▲推廣自助登機，行李磅不可或缺，此處走復古路線。



▲國際線出發航班顯示屏，除英文及中文轉頁外，係日／韓同時雙語標示，可見韓國遊客之多。此處顯示的 22 班航班，多達 14 班前往韓國。


▲G 區釜山航空人山人海


▲掃貨大約 40 分鐘，然後過安檢及出境，可能未到出境高峰期，唔使排長龍，非常順利。今次航班在 503 號閘，我去福岡幾次都未聽過。




▲禁區內有餐廳提供熱餐及雪糕，下次我想食，今次因為閘口遠就冇試到。


▲菲律賓航空 A321-231 RP-C9907，出發當日在香港見到佢。


▲行過幾個閘口後來到冷清一角


▲要落電梯，落到地面有個小型休息區。



▲穿過兩道自動門，出戶外又入返室內。



▲然後到達長方型的側翼，共有 501-506 六個巴士閘。




▲用戶唔多，當日只有 503 號閘有機用。




▲其他閘口的 seating area 都唔細


▲近 506 那邊設有電腦工作間




▲除了廁所、飲水機、吸煙室及電腦工作間外，此部分完全無商店（本來有但唔開），只有自動售賣機。


▲若要幫襯商店就要上返去：電梯單向下行，上行可用升降機。


▲位處地面，出面有圍欄，又有工事進行中，睇唔到其他飛機，望來望去都係得架賓航。


▲15:07 閘外來了一輛普通西鉄巴士


▲15:12 地勤開始棟牌及拉繩


▲按座位行數分批登機，首先係機尾的 Zone C，我地雖坐得前，但組中有老人，獲安排優先登機。


▲車頭山頂位



▲15:22 開車，15:24 就到了飛機外面。


▲機上清潔工作未完成，坐在車上幾分鐘才能登機。


▲起落架


▲遠攝全日空之翼 DHC-8 402


▲油罐


▲油車



▲15:32 上機，今次坐右邊。


▲15:50 push-back，轉向後見到 J-Air E170STD 及全日空 B787。


▲日航 A350-941


▲德威航空 B737-8AL HL8300


▲日本越洋航空 B737-8Q3 JA11RK：RK 者，琉球也。


▲15:57 開始滑行


▲國際線一列航機，6 架有 4 架來自韓國、2 架來自香港（加上坐緊有 3 架），由近至遠分別為：首爾航空 A321-231 HL7212、釜山航空 A321-251NX HL8357、國泰航空 A330-343X B-LBB、大韓航空 B737-8MAX HL8349、香港快運 A321-231 B-LEL、德威航空 B737-8AL HL8300。


▲今日向南使用 16 跑道


▲全日空 B787-8 JA818A



▲星悅航空 A320-214 JA22MC 起飛


▲Ibex Airlines CRJ-702ER JA12RJ


▲16:05 於 16 跑道起飛影片


▲菊池川出海口，對面係島原半島。


▲斜陽加上空氣污染，想影雲仙岳都唔係影得好清楚。兩日後沙塵暴吹到九州，好彩走得快。


▲圖中為上天草市大矢野島、下方為戸馳島、左方係維和島。


▲天草上島，遠方為下島。


▲有兩條橋處為永浦島、上方為樋合島。


▲望遠就清


▲在日本便利店買的飯團


▲日本時間 16:50 派餐，係雞尾包。


▲同空姐傾談得知，來回各兩款包，按月輪替，單數月去程叉燒包、回程芋蓉包；雙數月去程牛肉包、回程雞尾包。不知港航是否打算繼續維持此一安排，想食熱餐就要加錢預訂。


▲飯團比起個包實在好太多，空姐自己都係買飯團食。


▲沿途一片雲海


▲派餐時，同座三人都要七喜，空少用一罐斟晒畀三個，唔太夠；大約一小時後，空姐捧出斟好的蘋果汁，我就要一杯。派完飲品後，香港時間 18:02 機長出廣播話 prepare for landing。記得 2001 年第一次由福岡走，搭 JAL 767 旅行社包機，都係收餐無耐就 descend。


▲牛頭島


▲海上船隻


▲桂山島


▲18:26 於第三跑道 07L 降落


▲降落影片，10:15 後因談話聲太大而靜音。片尾可見阿聯酋 A380 已重臨。



▲英航亦有兩隻機



▲滑行 14 分鐘後於 18:40 泊在衞星客運廊 16 號閘，19:44 落機。


▲行行重行行，要搭好多電梯上上落落才到入境處。有趣觀察，成機人由日本返來，加上搭得呢班機都係即興買機票的日本痴，搭第一條電梯時個個都保留日本習慣企左邊，去到第三、四條電梯才陸續企返右邊。


▲天際走廊一攝


▲終點在望


▲落機後 18 分鐘到行李輸送帶，唔使等好耐，不需 20 分鐘就取得行李，時為埋閘後約 40 分鐘。


▲原本想食何洪記雲吞麵，但太多人，見太興有位於是又係食太興，加錢食雞髀。


▲比起 4 個月前，機場回復不少生氣。


▲等的士要拉龍排隊，我之前未試過，香港都幾年未見過。






▲FR24 航班資料及航線圖

感想

此次旅行突如其來，亦碰巧近我生日，就當係特別的生日及復活節禮物。人生第一次搭首航，經歷 water salute，即使 hard product 平平無奇，始終係難忘體驗。回程就無如此待遇，港航應該都係泊外閘盡量壓低成本，搭巴士行得遠先係常態。話雖如此，港航容許在超過 48 小時前預辦登機（實際上係輸入資料後，電腦系統於 48 小時前自動辦理），以及在福岡安排操流利英文職員，這些服務值得一讚。現在港航定位大概係「廉航以上、優質未滿」，近來亦推出多項減價促銷，百貨應百客，想去旅行而其他公司太貴的話，不妨一試。

——————————
其他飛行報告：
2022.11 HX 關西　2019.10 HX 札幌　2019.07 CX 倫敦　2018.12 HX 沖繩　2018.09 UO 關西　2017.09 UO 成田　2017.05 HX 米子　2017.03 UO 福岡　2016.09 UO 廣島　2016.04 CX 成田　2015.10 HX 札幌　2015.06 BR 台北　2015.04 UO 東京　2014.10 CI 高松　2014.06 QR 法蘭克福　2013.06 CX 中部/關西　2012.08 CX 札幌　2011.11/2012.04 KA 福岡　2010.09 AI 關西　2009.10 JL 東京　2009.03 KA 北京　2008.06 CX 法蘭克福　2007.05 NH 成田　2006.06 MU 山東　2005.07 CX 仁川　2004.06 MU 雲南　2004.02 CX 台北

航拍：
2021.11　2021.01　

好奇一問：香港買左機票，如果之後發覺唔想去、唔去得、太貴，有無得 cancel？

可能我太習慣美國呢邊運作模式了，法律規定買左機票後 24 小時內係可以取消兼全數退款，疫情開始後三大就算過左 24 小時都可以取消然後取回一年有效期 trip credit 留待下次使用，舊年我試過一次買機票後第二日跌左廿蚊美金，於是取消機票然後重新買過

香港呢邊出發前唔夠一個月先買機票可能比較少，但美國呢邊，內陸線計，出發前 21-28 日買機票係常態，亦唔少機會係呢個時候最平；我仲試過一次出發前五日先買機票，但淡季唔係貴好多，另外亦試過兩次出發前唔夠兩星期先買。當然如果係洲際航線，通常就真係早多 1-3 個月買

S3BL100 發表於 2023-4-22 22:13
好奇一問：香港買左機票，如果之後發覺唔想去、唔去得、太貴，有無得 cancel？

可能我太習慣美國呢邊運作 ...

有冇得cancel退款睇你買邊間航空公司邊個fare class，但通常除咗特定最貴嗰個fare class，一般就算可以取消都要罰錢

例如CX現時所有econ fare class都可以罰錢之後cancel，但UO則不然：
CX

UO

S3BL100 發表於 2023-4-22 22:13
好奇一問：香港買左機票，如果之後發覺唔想去、唔去得、太貴，有無得 cancel？

可能我太習慣美國呢邊運作 ...

這次兩套機票，包行李一套退票手續費 $700，無行李一套則為 $1,000。如果我退票再買，總付出金額應會比原先更高，亦可能無位，博唔過。幾日紅日機票早已搶到天價，假期最後一日快運三班福岡回港航班全滿，國泰無特別睇但都應該冇行，若非港航開售，根本無得飛。

假如真係有事去唔到，蝕一部分錢都無計，也可睇下保險有冇得賠；但如果純粹係價格問題，香港公司「不吃這一套」。

成$7000坐HX，仲要坐A320，去得4日，唔值喎

如果唔係有首航各樣公關活動加持，$7000 來回日本真係貴到喊...
我自己就無試過搭首航，最近似一次係 JAL B788 第一日正式 deploy 落 JL 736/735，但據我記憶，一切只係當 last minute equipment change 辦，當時仲未關注任何飛機，所以無影過相

本身復活節假期 + 櫻花季，4 月初去日本通常都好貴，唔知同期 CX UO 索價幾多?

反而有興趣知道額外加錢的熱餐會係點，第一次聽有呢個服務

同意港航 "廉航以上，優質服務" 呢個形容，不過寄艙行李收費、check-in 選位收費、不設 IFE 等，除咗會派一個飽叫做有食物，同 HKE / GBA 真心分別不大

Waiyin12 發表於 2023-4-24 05:48
如果唔係有首航各樣公關活動加持，$7000 來回日本真係貴到喊...
我自己就無試過搭首航，最近似一次係 JAL B ...

主要都係急，三月初香港解除口罩令及日本解除限航令，老人去旅行先至突然開綠燈，此時 UO 已客滿，CX 實劏得重勁，睇都費事。

今次真係冇得用平時價位比較，日本機位可謂開幾多食幾多，這對航班時間理想，加上 CX/UO 無法吸納而食晒班 last minute 客，來回航班都全滿，大家實在餓得太耐。

我無睇過復活節 UO/CX 價格，但就之後五月尾的旅程，兩個月前 UO 冇減價之下計計埋埋都要三四千，若現在才買，非特價要五六千。復活節假後，航班陸續增加，各航空公司才推出減價搶客，UO 加班機要二千幾。

港航餐單可參考以下網址，印象中加購費用大約$11x-$13x：
https://www.hongkongairlines.com ... /pre-purchase-meal?

其實而家HX同UO俾係有優勢嘅，連登啲人其實講得幾啱，HX有唔細嘅機會平過UO，但係UO就懶係network coverage好勁，但係到飛嗰時就欠人收機，HX就夠人先開port，喺reliability已經贏UO幾條街；然後UO啲Y凳塞到爆，legroom窄到嘔，HX同樣用A320但係起碼有legroom有padding，一定舒服過UO同款機，又係HX贏。因航自己管理不善咪算囉，擸咗人哋間公司返嚟搞到人哋三不像，連個branding都冇埋。講真有時見到UO個價，我寧願俾多啲啲坐CX自己，起碼俾架Widebody又有電視又舒服