當時2016年已經幾乎傾成事，不過俾 Epsom 嗰個 Chris Grayling 因政治原因阻止咗（唔想條鐵路將來落入 Labour 手中），結果成為一大醜聞，當年有呼聲要求佢落台添！
結果係南倫敦嘅乘客要日日捱貴車同垃圾服務。貴車係指本身相同區， National Rail 比 TfL 貴成60%；如果用 National Rail 轉地下鐵，更加貴上加貴。成個原因我唔詳寫啦，呢個係當年 TfL 最初推 Oyster card 嗰陣啲南倫敦嘅火車公司（無地鐵競爭嗰啲）唔肯收（北倫敦嗰啲就因同地鐵平排，唔收嘅話會流失乘客），最後話要俾另一個TfL無份控制嘅 fare scale 先傾得掂數。
講返正題，以前2020年前， Liverpool Street - Shenfield 嘅服務繁忙時間會飛站，當中最繁忙嗰個鐘甚至一個站可以無車停下一個站（例如 Maryland 可以成個鐘無車停 Forest Gate ），令到乘客無車搭；疫情期間 TfL 廢除咗呢個做法，變成全部車停全部站，好似地鐵一樣，成為喺全英國班次最頻密嘅 service pattern （伊莉莎伯線通全段以前，係繁忙時間5分鐘一班，全部車專用軌道來回 Liverpool Street - Shenfield 停全部站，完全好似香港嘅東鐵綫一樣，係傳統火車路軌經營地鐵服務嘅典範），而家喺繁忙時間 Stratford 搭伊莉莎伯線就好似搭地鐵一樣，全個月台嘅人逼上首班到站嘅列車，完全唔使再睇時間表同站牌。
來緊12月 West Anglia 改時間表，繁忙時間原本唔停 Bethnal Green 嗰幾班車最後都全部停埋，之前有某班車特別喺 London Fields 直飛 Liverpool Street 嘅亦都無埋，全部 Weaver Line 車都停全部站（路線圖上亦都已經劃返去 Chingford 嘅車唔會停 Cambridge Heath 同 London Fields ，呢個以前劃得唔清楚結果被人插）。多謝TfL。
而家係得返伊莉莎伯線西段重有車會飛站，因為收到時間表要安排空間俾貨運列車嘅限制，而家 Acton 嗰邊已經長期服務不足（Acton Main Line 由一個廢站變成最快直通市中心嘅車站，客量暴增咗幾倍），希望將來通埋EWR之後，啲貨運列車數目可以減少，長遠可以做到同東段一樣，全部車停全部站啦。
