究竟紅巴做漏咗幾多客？

紅巴保守，相信係巴士界嘅共識。
看似好大嘅巴士網絡下，有好多位都冇一條直車 (甚至插旗線)。
呢啲空間俾小巴或者其他巴士公司乘虛而入，而最後自己唯有執死雞，錯失新客源。


所以想藉機集思廣益下一啲九巴錯失嘅客源，我正文討論冇FF成份，亦都唔希望下面變成另一個F1版。
冇討論其他公司，最主要係因為我唔熟。
數返呢啲客出嚟，係因為佢哋或許會係鐵路版圖日益完善下，巴士嘅另一出路。

利申：我唔係要講一啲好似692/油塘去調景嶺嘅直車。

1. 屯門 - 上水
呢個應該係最出名，屯公冧檔想開線，但巴士唔想做。
最後變咗做小巴先想搶返啲客。依家得條行晒邊皮嘅261 (都仲要客量唔差，可見當年低估晒啲客)。
如果44系係巴士做，相信要做到276系嘅班次絕對唔難。
(利申：自己成日搭44系，我係支持44系嘅，因為真係夠快。)

2. 新東區間特快
因為有東鐵，九巴基本上係冇自己開任何行吐露港公路嘅新東區間線，只係得幾條行山路嘅72A/73/73A/74A。
最後小巴執咗大量大埔 - 城河東/馬鞍山嘅客，連城巴都用埋B8/79分一杯羹，九巴先後知後覺咁用W3格硬sell客同埋開73H。
其實好多時大家喺新東/新西區內走，有得揀都想一程過，唔係個個都咁鍾意駁腳轉火車再轉駁腳。
但依家區間市場飽和晒啦，先開始諗做大82C/274P (甚至W3)等，會唔會有啲太遲？

3. 新西區間特快
喺輕鐵運作之後，九巴就取消晒大部份大西北裏面嘅流水線，直到近年先有返以善用巴士空間為主嘅長途車雙向短途分段。
但喺跨屯元天三區之間，都係冇乜一啲善用新公路嘅特快線，只係得E36A順便做埋，但停嘅位都不倫不類。(理論上仲有B9嘅)
依家有新開69，之前都有招標嘅屯天線，但其實兩條線九巴都好似唔係咁有興趣。
(但69招嘅時候真係劃得好核突，而屯天線都有啲唔come做，因為屯門南延線其實過幾年都開，嗰條走線同屯門南延線撞得好應)
當然啦，就算69改返正路，客都唔係好多，畢竟輕鐵+K巴係做到唔少客。
或者如果路線適合嘅話，部份長途線應該係可以做好啲短途部份。
(例如E36A，係咪真係咁需要行喺屯公三站呢啲同屯門站10分鐘步行距離嘅站之後，去天水圍站呢？)

4. 沙田站 - 住宅區
沙田站基本上可以話係新東嘅中心，直達客唔少，亦都有好多人會用呢個位轉其他巴士/小巴/火車。
但九巴先係冇做798式嘅沙田線，之後開88X俾藍田山亦都唔係一開始就做沙田站，同埋有半日都係要做埋觀塘，一直而嚟都係對新東嘅雙向客冇乜信心。
(我知有好多其他原因，但如果想做快線嘅，大可好似290咁開兩條線，而唔係讓比人做。)
就算係淨係服務山嘅88，都係一條招標線。
依家越嚟越多人北上，沙田站嘅人流冇少到，88/88X轉車客喺長假期尤其明顯。
係咪仲有啲地區，其實都係應該要開條沙田直達線？

小結：
都係嗰句，我淨係講九龍新界，係因為我真係唔熟港島。
呢個討論本身亦都係有啲馬後炮，因為上述嘅客源其實開線嗰刻可能未必多，之後先慢慢catch up。
但交通本身就係一門預測將來嘅學問，
呢一刻巴士公司可能發現用轉乘去兩區嘅人唔多，
一方面可能係因為未有需求，又或者另一程唔係轉巴士啫，但真實兩區之間可能有潛在需求。

而絕對有人會話地鐵都就開，但係咪等於巴士就會死晒呢？
無可否認鐵路會搶咗好多巴士客，但香港嘅鐵路更多係真係為嗰區帶嚟人流、經濟活動，
所以一啲鐵路網絡下迂迴嘅地區，巴士係相當有潛力。
你睇下荃灣西一帶，唔通930X/33(B)就因為都係去地鐵站就冇客咩？
依家連66M、古洞荃葵線都要做埋荃西，就知荃西因為地鐵 (西鐵)真係多咗需求啦。

我哋可能好難每區都有晒所有直車，但用轉乘網絡下，開一啲新區/住宅區去新市鎮中心嘅車，其實唔係太過份。
尤其喺將來大大小小嘅新區，除咗NPC式咁開九東/九西/港島線外，係咪應該有其他路線空間？

歡迎討論。
(今次冇乜research，主要係憑感覺討論為主)

新西係近年先開始鬆綁可以由非港鐵去做屯元天區內
而九巴係鬆綁前本身都無乜跨區線可以俾佢用到嚟做呢 D 屯元天跳區客 (堆線改哂行大欖隧道)
所以呢個唔係九巴唔做 , 係原有政策唔俾佢做 , 然後繼續 keep 住唔做咁解 , 反正點搶都唔夠輕鐵西鐵方便

73A 改科學園唔講？

274P 82C 死都唔全日益左 806 系

274P 改 7 日之後爛班次都唔諗住執

其實巴士同小巴各有 pros and cons,  如果44系比九巴做， 以今日既標準每班車要座滿／企人 起碼變左10幾分鐘1班 疏小巴幾倍你又制唔制先 仲未計左兜右兜 行車時間大幅增加

其他例子 55k小巴 vs 78k

上星期六去左沙頭角 5點幾6點鐘條78k夠膽死開30分鐘一班 而小巴就密密開 前車走左 然後一架吉車跟住開 之後到我搭個架 5分鐘後開出 沙頭角總站上15，6個 去到閘口打爆 後面又有架吉車跟住一齊開 咁既情況 你要幾分鐘一班小巴 還是 20-30分鐘一班九巴呀