浸鹹水遇溺記 第二十八回 BA1470 LHR-INV 北上的步伐

-- Foreword --

雖然呢個系列叫 ‘浸鹹水遇溺記’ ，不過老老實實 四年黎小弟旅途上都係安然無恙 - 小弟係搭乘五十程航班之中 最驚險既事應該都係 1. 搭港航之後遭天譴 同埋 2. 係奧地利航空上面差少少餓死 咁解～～

豈知黎到小弟要翻英國行畢業禮既時候就真係遇溺 - 仲要唔係浸一下就算 佢係一浪接一浪咁拍埋黎 - 即使小弟一年後望翻轉頭 都依然覺得刺激…

-- Flight Info --

1S25 EUS-INV Caledonian Sleeper "The Highlander"
Class 92 w/ Mk.5 Coaches (EUS - EDB)
Service divides at Edinburgh for Fort William (1Y11) and Aberdeen (1A25)
Class 66, Class 73 w/ Mk.5 Coaches (EDB - INV)

BA1470 LHR-INV G-EUUU
Airbus A320-200
STD 0755 ATD 0828 (BST)
STA 0935 ATA 0937 (BST)

-- Preamble --

二〇二二年，香港以外既世界已經漸漸復常，而世界各界亦開始拾起步伐，努力追回疫情兩年間失去既時間。小弟既大學亦唔例外 - 大學宣佈會補辦兩年前因為疫情延誤既畢業禮 - 而小弟便同家人一同前往英國參加畢業禮，順便黎一個久違既 family trip。

抵達倫敦後，小弟原先計畫於倫敦遊走半天，與當地既朋友食餐飯，再於當晚登上由 Caledonian Sleeper 營運既 The Highlander 班次，坐十三小時既火車 由 London Euston 前往 Inverness，直達蘇格蘭既 Highlands，展開我家既 family trip。

The Highlander 為英國僅餘既通宵火車班次之一，將蘇格蘭北部既個個城市以一晚既時間連接英國首都倫敦。(其他班次分別為 gWr 營運既 Midnight Riveria，由倫敦前往英格蘭西南區域既，以及由 Caledonian Sleeper 營運既 The Lowlander，不過呢個班次只會前往格拉斯哥及愛丁堡) 火車會先由倫敦出發前往愛丁堡並分成三個部份及換上柴油機頭，分別前往 Inverness, Fort William 及 Aberdeen 三個城市，以及停靠沿途各鄉村小鎮。值得一提既係火車公司會安排通宵火車特意慢駛，以減低嘈音及震動，提升乘客既舒適度 - 日間既 London - Inverness 火車班次只需八小時，而晚間既 London - Inverness 火車班次卻需時十三小時。

價錢方面， Caledonian Sleeper 絕對唔係一個廉價既選擇 - 車票價格係以房間計算，而最貴既 Caledonian Double Ensuite (雙人床連洗手間) 係收取四百多英鎊一程。不過由於乘客可以省上一晚於倫敦下榻既旅館費用，因此有唔少乘客係樂於付出呢個高昂車票，順便享受車上既酒店體驗。小弟一家雖然只有三人 不過由於房間不能與陌生人共享 因此最後購下兩間 Club En-suite 房間，希望以一個舒適及悠閒既方式展開一家人既蘇格蘭之旅。

-- An Ominous Start --

不過，跟唔上世界復常步伐既，除左香港同法蘭克福既地勤工人之外，亦有英國鐵路界工人既薪金 - 佢地既薪金於疫情兩年間被凍結加幅，而遇上疫情後既通脹同生活物價急升，基本上佢地既工資係俾人打左八折 - 工潮二字日日見報，復常二字一早已是空談而已。

小弟出發前一星期，ASLEF 宣佈旗下 5500 名工會成員將會於七月尾罷工一天，以爭取更好既薪酬加幅，而不久後 TSSA 亦宣佈旗下既工會成員亦會響應罷工。

首先小弟要簡單講解下究竟 ASLEF, TSSA 呢兩個工會係咩黎 - ASLEF 全名為 Associated Society of Locomotive Engineers and Firemen，係一個以火車司機為主既工會，並位數兩萬多名成員，而 TSSA 全名為 Transport Salaried Staffs' Association，成員以鐵路界既從業員為主，並位數一萬八千多名成員。

雖然 ASLEF 既罷工只係針對八間火車營運公司，以及上述兩個工會並非英國交通界入面最大既工會組織 (最大既工會為擁有八萬名成員既 RMT - National Union of Rail, Maritime and Transport Workers) 不過由於 TSSA 旗下會員有唔少係於英國既鐵路基建公司 Network Rail 任職鐵路系統以及路軌信號管理， TSSA 既罷工基本上係直接癱瘓大半個英國既鐵路網絡。所以，同上一回 遇溺記 一樣，而今次罷工既唔係營運公司自身員工，而係負責後勤既員工。

由於往後兩日既晚間火車班次已經全部售出，詳細閱覽旅遊保險既細則之後，小弟便決定一家改乘 BA 由 Heathrow 飛往 Inverness - 早上乘漢莎航空到達倫敦後先留宿一晚，再於翌日早上飛抵 Inverness。

-- Speedbird --

鐵路工潮陰霾下，小弟同家人相隔一日再次光臨倫敦希斯路機場。今次係小弟第一次用到五號客運大樓，亦係小弟第一次搭乘由 BA 營運既國內航班。

英國航空於希斯路機場採用一個半自助既模式辦理登機手續 - 乘客會先行於一個 Kiosk 自助辦理登機手續，再到一個有職員既櫃檯確認手續以及把行李寄存。呢個程序係幾清楚易明，而當日既等候時間亦相當理想。

不過 T5 既禁區就非常繁忙 - 整個區域佈滿沒有配戴口罩既旅客 - 作為一個兩年黎無除過罩既一個庶民，第一眼見到係真係有少少衝擊既。如上回講到 - 真係要適應呢個新常態，重新認識呢個世界。由於小弟當日係安全檢查用左唔少時間，小弟一家並沒有於禁區逗留太耐並直接前往登機閘口。

雖然當日正有火車工潮 並影響到西岸幹線以及東岸幹線兩條主要鐵路幹道，不過今日既航班只有半滿，而各乘客好快就安頓好 - 機組人員作出安全示範後，飛機隨即 pushback 及排隊起飛，往英國北部進發。

起飛後 機組人員隨即開始簡單既 Inflight Service - 飛機係有提供免費既支裝水同穀物條，唯其他飲料同食物 (例如咖啡, 三文治等) 則需另外付費 - 穀物條係一個幾好既選擇 - 肚餓既話可以充飢，而如果上機前已經食左野既 可以拎走當小食。由於小弟降落後已經有 lunch plans，所以並沒有研究當日既 Menu Options，不過從觀察所得，唔係太多乘客選擇付費項目~~

座位方面，英航既 A320 機隊係選用 B/E Aerospace Pinnacle 既座位 - 雖然呢個座位常常被詬病 (尤其係如果你乘上一班往開羅既四小時航班)，不過佢係短途線上係非常足夠。佢既仿皮設計令佢美觀之餘又易於清潔，而每個座位皆有 USB 充電，以及座距幾好。

最後就講下機上娛樂，飛機係沒有椅背既娛樂系統，不過機上有 wi-fi 提供 - 呢個網絡除左用作付費上網用途之外，係可以閱覽餐牌 地圖以及其他同英航有關資訊。

飛機好快已經飛越蘇格蘭高地，並沿 River Ness 往 Inverness 進發。航班於 0935 準時降落，而餘下既部份就好順暢咁渡過 - 機場既效率係非常高 - 降落十五分鐘都無 已經係行李輸送帶上面拎回行李。係接機大堂辦理租車手續後，小弟一家便駕車進入蘇格蘭高地既腹部，展開一個闊別兩年既 family trip~~



歡迎黎到小弟既第二十八回遇溺記 - 今次小弟會搭乘 Caledonian Sleeper 既 The Highlander 由倫敦通宵前往蘇格蘭北部 Inverness... 等陣先 - 又有工潮？真係估唔到相隔唔夠二十四小時，小弟同家人再次黎到倫敦希斯路機場~~


雖然航空業依然係復常中，不過希斯路機場已經疫情前同樣繁忙


希斯路機場既候機區 - 雖然唔少地方貼有 ‘邀請’ 閣下保持社交距離，不過老實講 二十年前興建既建築又邊有可能預計到今時今日會要呢個要求呢?


左邊係一部兩歲既英航 A321neo,而右邊係今日既主角 - 十四歲既 A320-200 G-EUUU


雖然當日全國既火車網絡因為工潮停擺，不過呢班機又無特別滿，當日載客量只有八成左右~~


B/E Aerospace Pinnacle 既座位雖然常常被詬病，不過佢係短途線上係非常足夠。佢既仿皮設計令佢美觀之餘又易於清潔，而每個座位皆有 USB 充電，以及座距幾好。


起飛後，機組人員向每個乘客派發支裝水及一條細既穀物條 - 咖啡/三文治係要另外購買，而閣下可以連上機上既無線網路查閱餐牌。


//望著道路亦變遷 彎彎曲曲的視線
這個世界再不新鮮 曾愛恨 曾灰暗 人生的試煉//
周國賢 太平道


雖然 Inverness 只係一個中小型城市，不過其 Air Network 係相當豐富 - easyJet 同英航皆有提供一日多班來往倫敦既航班，而蘇格蘭既航空公司 Loganair 則提供來往各北方島嶼既服務。


細機場都有細既好處 - 落地十分鐘都無，行李已經係輸送帶上面轉緊~~


雖然機場每日只處理十多班航班，不過直升機既 movement 則頻密得多 - 機場係有多間直升機公司駐守，主要服務位於北海既鑽油平台以及風力發電場，為北海上的各類設備提供補給及工人輪替。 (係 北海既工人係搭直升機翻工既~~)


順帶一提，延文禮士機場火車站已於 2023 年投入服務，如閣下係前往Inverness, Elgin, 甚至係 Aberdeen，讀者都可以考慮乘搭既~~


辦妥租車手續後，小弟一家就向蘇格蘭既 Highlands 進發 - 小弟今次會連人帶車搭船前往 Isle of Skye ，並會搭上世上第一代既汽車渡輪。有興趣既，不妨睇埋之前寫落既 Trip Report~~

----------------------------------------------------------------------------------------

如果閣下鐘意小弟既飛行報告既話, 不妨睇埋之前寫落既其他旅行報告~~

一個蘇格蘭島嶼, 兩個汽車渡輪既故事

• MV Glenachulish & CalMac MV Loch Fyne
  

一個探訪退役協和號 G-BOAF 的故事

• 浸鹹水遇溺記 第六回 - A Visit to Aerospace Bristol
  

一個避完稅走去翻學既故事

• 浸鹹水遇溺記 第八回 - British Airways (Eastern Airways) BA3287 Isle of Man - London City
  

一個拜訪英製古董民航機的故事

• 浸鹹水遇溺記 第十九回(中) - Imperial War Museum Duxford
  

話說我今年二月份飛 BA LHR-EDI 果陣都係由 LHR T5 Gate A2 飛，而且同樣係朝早

不過可能因為唔係好似你班機咁早，小食係派 chocolate biscuit 或 oat biscuit 而唔係 whole grain bar

當然 Caledonian Sleeper 會係一個好有趣既嘗試，樓主錯失機會係有少少可惜。歐洲內陸坐火車幾乎一定比起坐飛機有趣，我果次坐飛機好大程度係因為時間限制，加上唔想火車上面過夜，所以直接飛上去就算

同埋坐火車固然有機會唔好彩碰到罷工，但坐飛機一樣都會，機場地勤同機組人員都同樣可能會罷工，所以真係睇好唔好彩