日本航空 SKY SUITE III 東京(羽田)>香港 體驗

日期：02JUN2024
時間：09:55(10:28)-13:30(13:31)
航班：JL29
機型：Boeing 787-9 JA871J


時隔年半，英航Avios 系統又只係畀到JL29呢一班早機我，抱著今次唔會再改downgrade 去787-8嘅一絲希望又再一次用里數兌換呢一班機，慶幸嘅係今次日航無再改執飛機型，如果日航無新機型派嚟香港航線的話今次可能會係最後一次坐日航。

今次酒店安排喺羽田機場T3嘅新酒店，所以可以遲少少起身行過去T3。

今次終於搵到商務艙櫃檯，但由於無行李嘅關係都係用返自助機會比較快。

今次首次試用Face Express服務，自助登記面容識別服務，用途同香港機場登機易一樣適用入進入出境前及登機閘口。

時間尚早，可以嚟到羽田機場著名打卡景點影相留念。

夠鐘入閘，今次去返同一個出發口但人流相比上次真係少咗好多，頭等/商務Face Express 會有一條特快通道進入安檢。

由於事隔太耐無嚟過羽田機場T3走錯咗去頭等貴賓室，行返轉頭見到呢個牌先係商務艙嘅貴賓室。

機票上已經話你知去邊個貴賓室但就係無提近邊個閘口。

有得去5樓寫明係SKYVIEW就當然係去呢度最好可以睇飛機。

留意返開放時間有限，可能坐其他日航航班就要去返4樓。

由於喺酒店已經食過早餐，留肚食返個日航貴賓室名物咖哩飯，呢隻咖哩唔係甜口嘅咖哩而係偏向香辛料味重嘅咖哩，聞名不如見面真係好食，今次因為無揸車嘅關係所以可以大飲特飲。

咁啱見到全新A350-1000拖機埋位，唔知幾時先有機會坐到？

當我知道閘口係138時我並無感到有任何奇怪嘅地方，但搵到之後就聽到直升機機嘅聲，雖然喺日本已經唔係第一次要坐接駁巴士出泊位上機，但今次多咗登機箱真係好惡頂，想知點解？

成田羽田兩大機場主要係用呢種非低地台巴士，喺現今社會已經係非常不合時宜，如果喺香港要坐接駁巴士去停機坪反而我無乜幾可會投訴。

Star Wars 特別塗裝ANA飛機。

落得車，其實後面兩架巴士都一齊到埗，幾年前喺成田坐ANA咁樣用巴士接送乘客去停機坪有分流作用，但今次就明顯無用。

今次終於可以坐到SKY SUITE III，1-2-1反魚骨佈局理論上係公認最好嘅商務艙佈局，而另一套2-2-2嘅SKY SUITE以前會投放喺JL735/376，依家呢對航班用開787-8舊product飛，暫時無緣乘坐；返嚟睇返呢架飛機，拖鞋、毛氈、耳機全部已經準備好喺座位上，呢隻座位都係用返三點式安全帶，起飛降落外安全帶燈號亮起就可以只用兩點式部份同其他航空公司一樣。

耳機插仲係傳統飛機插，有需要可以自備轉接器用返自己耳機；充電位分別有USB A同通用插座，USB一般而言係夠用嘅。

打開櫃門只有耳機存放位置同櫃門上嘅鏡。


MAGIC-VI系列唔係第一次用，但之前印象係772嗰套唔係用呢款遙控，總之娛樂系統全靠呢個遙控操作，無得直接用大屏幕操作。日本航空公司就唔好旨意多嘢睇，但出奇地有套講加拿大手機品牌黑莓嘅電影係有少少意外。

機上集誌、WiFi使用方法、安全卡全部放喺集誌架上，下方係調較座位嘅控制面板，注意呢款座位真係有功能，唔係星宇A339嘅震動扮。

Armrest無彈弓，要手動拉上嚟，起飛降落一樣要收起。

本季餐單，基本上每月會有不同餐點，日式西式都會有兩款選擇，網上亦有預訂餐點服務但就同國泰一樣，而非之前搭過嘅星宇/長榮咁有網上預訂限定餐，坐完台籍航空公司真係好難返轉頭。

巧遇國內線A350-900銀色字樣塗裝機。

起飛到差唔多高度就開始派小食同飲品，一如以往係米菓+堅果組合。

今次我選擇西式餐點，漢堡排配意粉，西式味道都係有水準，漢堡排十分厚實，餐包係空姐直接畀我無叫我揀，夠熱同埋好好食。跟餐係可以叫多杯飲品但我夠皮就無要。

餐後甜品都係雪糕一杯無驚喜，坐完星宇真係拉高咗個標準。

食飽坐陣又係時候解決網絡成癮嘅問題，喺宣佈WiFi可以用嘅時候就已經課金用緊，價錢同年半前一樣無變，唯一唔同嘅係今次需要自己喺連接WiFi 後自行用瀏覽器前往付款畫面，日航講明用途除咗VoIP電話不適用外亦唔可以使用串流服務。

坐完星宇再坐返日航就會發現日航係縮皮得好緊要，同返近似嘅國泰比較僅係服務同餐飲上有些微領先之外就會發現同國泰越嚟越近，再對比台籍兩間premium airline星宇/長榮一啲細節就比下去，去年我認為我會真金白銀買機票飛日本坐商務會坐日航，如今結論就會改成為真金白銀坐商務飛日本我會揀台灣航空公司而非日航。今年飛行報告暫告一段落，淨返今年9月會再有一篇，明年因為家庭因素要收心養性會大幅減少外遊次數，咁就真係好少會見到我出現喺航空版啦，我哋9月見。