日本鐵道初秋大豐收・關東篇 (東京單軌開放日、山梨磁浮)

【關西篇】

承接關西篇，我喺10月6號就搭新幹線去東京；當日影完南海去到南港ポートタウン線（南港Port Town線）已經開始落雨，搭新幹線見到窗外一直都無停雨，真係擔心第二日日比谷公園鉄道フェスティバル（Festival）會唔會好狼狽。

先去新宿站睇下

E257系特急「かいじ（甲斐路）」，讀音同「Kai子」一樣 ，呢班唔係臨時列車

不過就係一日兩班往竜王既其中一班，個名好霸氣



隔離就停左另一列E257系

附屬編成同基本編成連結位，2號車有簡易駕駛台

又係E257系，行青梅ライナー（Liner）

由河口湖返到黎新宿既快速「富士山」（189系グレードアップあずさ（Grade Up梓）色塗裝，宜家豊田車輛中心得返3列，全部都唔同塗裝）

新宿站睇完之後先返酒店一陣，之後再出去東京站。

京葉線用既E233系5000番台

武蔵野線既205系，呢款車頭用上FRP（纖維強化塑膠）造成既獨特外表被日本鐵路迷叫做「メルヘン顔（童話樣，メルヘン德文係Märchen）」

E257系500番台，暱稱為「Boso Express」，行特急「さざなみ（漣漪）」



東京站京葉線地下月台既0公里標

感覺由京葉線地下月台行返去東海道本線、山手線等等既月台唔係啲人講到咁遠。

秋天時分寢台特急「サンライズ瀬戸（Sunrise瀬戸）」會將終點站由原本既高松延長到琴平。

285系寢台特急「サンライズ瀬戸・出雲」，佢地係現時唯一仲有定期行走既大眾化寢台特急列車，1998年登場。當年用客車既寢台特急「瀬戸」同「出雲」呢兩班列車既走綫被認為與飛機等其他交通工具有競爭力，可以一戰，所以先開發近代化既電車版寢台特急，由JR西日本主導。サンライズ出雲近年好受去出雲大社參拜既女性歡迎，電視都有特輯報道。

唔似以前用電氣機關車（電力機頭）咁，運轉士毋需再進行特別訓練，因為駕駛操作同普通電氣化火車基本一樣。

左邊係屬於JR東海既3000番台，右邊係屬於JR西日本既0番台，兩者會喺岡山站分離。呢幅可以睇到JR東海繼續用國鐵字體喺車輛編號度

サンライズ出雲會經伯備線去山陰方面既出雲市

サンライズ瀬戸會經瀬戸大橋線去四國方面



設有28席「ノビノビ座席」（Nobi Nobi座席，伸展既意思）同兩間單人房既5同12號車

ノビノビ座席毋需額外比寢台價錢，好受歡迎。

下層

10月7號就係日本鐵道迷總動員既鉄道フェスティバル（Festival），佢係一個集合日本全國大大小小鐵路公司既嘉年華，各間公司都會趁呢個機會發售最新商品同舊車更新、報廢後拆出黎既部品。每年日本鐵道之日（10月14日）前一個星期六同日都會喺日比谷公園舉行，非常多野睇／買。

晨早流流已經好多人排隊買模型，每年都係關西私鐵既攤位最多人排，關西人商業頭腦果然駛得 ；我鍾意阪急，預先網上睇左有咩限定野，所以排佢先。

京阪電車條龍其實去到好後

同動漫合作佢有一手（Head mark販賣）

唔知點解青い森鉄道咁多人？

JR九州有豪華列車ななつ星（七星）既精品特別販賣，不過我免疫。

支持下貧窮既JR北海道啦！

好多清貨商品既JR東海，其中有賣左好耐既チョロQ、B-Train。另外JR西日本同貨物吸引好多人：JR西日本有各種京都鐵道博物館先有得賣既限定商品，JR貨物就有機關車編號牌、寢台列車head mark精品。

賣鐵路便當既日本Restaurant Enterprise

入面有展板介紹各種鐵道技術，鐵道要「親民」其實唔難

先行販賣既J!NS眼鏡，設計靈感來自E235系，因為一早賣完所以無咩人

有比細路坐既小火車同Thomas吹氣彈床

原本下晝要趕去東京モノレール（單軌）開放日，點知去到浜松町站月台發現好似無咩家庭搭單軌，上到車先知原來因天氣關係改左去聽日。 諗起大井競馬場站嗰度影相幾靚，同埋可以行去睇新幹線車輛基地，所以就順其自然繼續搭。

1000形駕駛台

1000形，左邊係登場時塗裝

新塗裝

10000形

大井競馬場站月台結構睇落好簡陋，其實還好

雖然係初秋，但係太陽仲好曬，所以行20幾分鐘去大井車輛基地好熱

來自JR西日本既923形3000番台ドクターイエロー（Doctor Yellow）。橫跨大井車輛基地既天橋上面有得好細個窿既金屬板，影相有難度。

JR東海自己既923形0番台ドクターイエロー



好多N700系

沿天橋再行過少少就係東京貨物ターミナル駅（東京貨物Terminal站）



有架EF65形2063號機，有JR貨物30周年Head Mark

行落地面睇

先經過大井車輛基地既入口，有好多基地內行走既巴士；今次無巴士篇，得少少相所以就放喺度。






行到去泊左好多新幹線既位，應該唔少鍾意新幹線既人都見過類似既構圖 （700、N700系）

啱啱好有運轉士出黎，佢每橫過一條路軌就要做指差確認。上年去浜松工場參觀嗰陣佢地既制服仲係米色，今年6月換成深藍色之後差啲唔認得

搭返單軌去天王洲アイル（Isle）站，由東京單軌行去東京臨海高速鐵道りんかい線（臨海線）轉車都幾遠，個人認為遠過東京站京葉線月台

東京單軌著名拍攝點（10000形）

1000形登場時塗裝

去到大崎轉車搭湘南新宿ライン（Line）去大宮（埼京線E233系7000番台、東京臨海高速鐵道70-000形）


去到大宮站（E231系）

E233系3000番台

月台可以見到大宮總合車輛中心工場（E231系）

黎大宮做乜呢？其實有一班カシオペア紀行（Cassiopeia紀行、仙后座紀行）由上野出發往盛岡，所以黎影。

EF210形「ECO-POWER 桃太郎」拉既貨物列車

好多石油貨卡

EH500形「ECO-POWER 金太郎」拉既貨物列車

最新既81號機，呢架無貨卡

カシオペア紀行，EF81形北斗星色塗裝，後面拉住E26系客車








工場唔知點解有幾卡小田急4000形

喺大宮睇下唔同既鐵道鋪頭之前先睇埋東武野田線。近年野田線有個暱稱叫東武アーバンパークライン（Urban Park Line）。

60000系



8000系，佢被稱為「私鐵版既103系」，原因係佢開始製造到停產既年代同103系相近、時期又一樣咁長、總車卡數又係私鐵之中最多



車內


大宮站埼京線地下月台既E233系7000番台


今次旅程一到日本就買本最新既JR時刻表同DJ鉄道ダイヤ情報，預先知道啲臨時列車係咩車型、到站時間等等，所以先知呢班黎到中途站大宮係幾點停車。

臨時快速「お座敷 鹿沼秋まつり（座敷列車 鹿沼秋祭）」

485系「華」